YEREMIYAS 16 - BIBALDA TA PELDETTA

Bakmarana hiɗi yawta gorvota

¹ Ma-Vatɗina ka di yoboyna valam tan ala:

² Naŋ ma sli ca noŋɗi. Liyn tani naŋ ma vuɗ goor ma juf hayamɗi, goot-ca hayamɗi kaw.

³ Kayni mi va ma Ma-Vatɗina dumu kay guro-boyna hiɗi guro-jufayna sa vuɗ hay liyn tan ɗawni, kay sumaysi sa boyna hiɗi sumaysi sa jufayna, sa vuɗsi hay nagat tan ɗawni,

⁴ nisi ma mita, moyn ma cimsiya. Sa as tiysiɗi, sa as pisi gaaɗi. Nisi ma molays kulo kay yam nagata ki zigidikŋa nala; kew-gaferaŋa hiɗi mayta ma vatsi goyo; tuwsi ma mitina ma li mi tina vi layay ma dukalawna, hiɗi muur ma kay nagatna.

⁵ Kay Ma-Vatɗina ka di ala: Naŋ ma kal kalaf hay ziy ma ti do'ollaɗi, naŋ ma tuɗ kuɗ tokŋɗi, yor tuwaŋ hiɗi nisiɗi; kay toyta vanu, ŋaata vanu hiɗi slugota vanu, nan yawa'awa goy kay sumun kayni. Din mi Ma-Vatɗina.

⁶ Sa ŋulona hiɗi sa gurayna ma mit hay nagat tani; sa as pisi gaa loɗi, sa as tiysi loɗi, sa as jir tuwam loɗi, sa as wel yalam goy kuɗsi loɗi.

⁷ Funa vi do'olla ma teŋ ir sana kay mitta nisi ma tum loɗi. Kaway-ma-cina vi teŋ-irta ma vulum mi bumna hiɗi sumda sa as vulsit loɗi.

⁸ Naŋ ma kal kalaf hay ziy ma yuldeta visi noŋɗi, naŋ ma mus gaa hiɗi nisiya kay ti fun hiɗi nisi noŋɗi, kay ci niyn hiɗi nisi noŋɗi kaw.

⁹ Kay Ma-Vatɗina vi vok-ma-duura, Lawna vi Israyel di ala: Humgiya, ciriyna vi yuldeta hiɗi firita vigiya, hiɗi nulla vigi ma dabayna nan min vatam goy hay liyn tani, vatam goy kirgiya, hay buura vigiya.

¹⁰ Hay li ma naŋ di slen kaynawa kaf mi sum nisina, nisi ma di taŋ ala: Ma-Vatɗina min vulma lasta ŋol nala kay mige? Jiw-zlata vuma'a mi mige? Suluk ma numa lum kat Ma-Vatɗina Lawna vuma'a mi suluk mige?

¹¹ Nala naŋ ma hotsi dit ala: Sumaygi noyan goyo, din mi Ma-Vatɗina, nisi kalay kuɗ lawayn mara'a, nisi sun lawayn namna, girif gaa vokomu kaw, nisi noyan goyo, min li kuɗ vun-ma-gatna vanɗi.

¹² May nigiya, nigi li jootawa ŋolo suw sumaygiya lo; nigi li kayni, gigekaw tap kuɗ varta joota vi dikamu, kay nigi min human noŋɗi.

¹³ Nan min yawgi ays hay nagat tan pa, nargi hay nagata ta nigi bay wa' tuwa, nigiɗi, sumaygiɗi kaw; ɗawni, nigi ma sun laway mara'a hay falayta hiɗi henjeta kaw, kay nan ma ligi slugot loɗi.

¹⁴ Ma-Vatɗin di'e: Humgiya, buur ka tuɗay ɗaw, hay buur namna ɗawni, nigi ma di ala Ma-Vatɗin ka iriya loɗi, Ma-Vatɗina mi ma yaw sa Israyella ay goy hay nagat Egipte pa, nigi ma di nala loɗi.

¹⁵ May nigi ma di ala: Ma-Vatɗina ka iriya, namu mi ma yaw sa Israyella ay goy hay nagata ta gal gaata pa, hay naga ma nam gisi irsi goy hayam pana. Nan ma hotsi hay nagata visiya, nagata ta nan vula' mi sumaysiya.

¹⁶ Ma-Vatɗina di'e: Wulini nan min cuk sum sa ciwna ŋolo kay ciwsiya; bugol kayni lo, nan ma cuk sa gi daara ŋolo kay gisi daari, kulo kay hiɗiyna hiɗi liy ma ɗiŋiriŋŋa kaf, hay zul hiɗiyna kaw.

¹⁷ Kay iran ka cuki kay poyta visiya, poyta visiya may ŋayay goy vok iranɗi, joota visiya may ŋayay vok iranɗi,

¹⁸ Jewe, nan ma vulsi wurakŋa visi sem ma' tuwa, kay raw-goyta visiya, kay sulukŋa visiya, kay nisi muɗ nagata van goy waa'a, kay nisi hob nagata vanawa hiɗi tuw ma mitina vi laway ma waana visi ma liwisna.

¹⁹ Ma-Vatɗina donota vanu ma nan ŋay taŋŋa, liyn ma ŋayna vanu hay buur ma lasta, jaf-sumun ma ma taŋu goy hay vun-dabaŋgu'ta vi nagat pa, nisi ma di'e: Sumayma yawa' voco ti sinda, lawayn ma waana, ma as gutɗina.

²⁰ San as kay kot lawayna ma may lawayɗin su?

²¹ Kuɗ na'ta kayni, nan min ɗeksi wulini, nan min ɗeksi gaŋeraŋa hiɗi donota vanu; nisi ma wi ala semda van ala Ma-Vatɗina.