YAKUB 5 - BIBALDA TA PELDETTA

Tam sa maariyana hiɗi sa viyna kaf

¹ May wulini nigi sa farayna, tiygiya, tiygi hiɗi delgi kulo ŋolo kay joota ta min co kigiya.

² Farayna vigiya buwawa, sligara vigiya tumawa.

³ Ora hiɗi doorota vigiya saŋawa, saŋŋa valamu ma li di-goyt kigiya, ma loɗgi sliwgi goyo ki kuta nala. Nigi tok faraynawa hay buur ma cawn lakŋi.

⁴ Humgiya, sum sa li lopna hay sinena vigiya sa nigi min wuraksiɗina, wurakŋa visiya ka siwel kulo'o, siwelda vi sa feɗna coowa ta-ta hay hum Bum-Sumuna vi vok-ma-duura.

⁵ Nigi ti sle ma jibetna vi nagatawa, nigi poyawa kuɗ darta vi sliw tuwgiya kaw, nigi hob haygiyawa hay buur ma kitata.

⁶ Nigi ka kitatawa, nigi ci sa ma ɗigerawa goyo; nam may col kulo vokgi noŋɗi.

Gatta tara'a tara'a

⁷ Kay na'ta ɓosiyonna, cubgi ŋali ta-ta Bum-Sumuna ma'a. Ɗuwgi tam sa ma zumna tige, nam cub vuɗ ma ŋaana vi sle ma nam cukum gaana, nam ka hiɗi cubta-sle'ta kay kayni, tun caw tam niy ma si jewna ta-ta tam ma si cawna.

⁸ Nala nigi kaw cubgi hiɗi ŋalda, vigi dikgi dono'o, kay mata vi Bum-Sumuna ka goboyo.

⁹ Ɓosiyonna, deɓgi kay tuwgi jar-tuwgiɗi, kay nigi ma fi kitatɗi, ɗuwgi bum kitata ka coli vok vun-ziyna.

¹⁰ Ɓosiyonna, nigi ma ziy lasta, nigi ma li hiɗi zigin-zlata kaw, ki sa jobta-Lawna sa law hay semda vi Bum-Sumuna nala.

¹¹ Humgiya, nigi sa ziy lasta nay fi di ala sle'ta ka kisiya, nigi humi labara kay colda ɗeŋga vi Job, nigi wi slen ma Bum-Sumuna vulumta hay vatta vi lasta valamu, kay Bum-Sumuna hobay hiɗi slugota hiɗi wi-hawta.

¹² May suw slen pet ɓosiyonna, nigi ma yi va kigi hiɗi wuralawnɗi, yi va kigi hiɗi nagatɗi kaw, yi va mara kigi noŋɗi kaw. May awata vigi ma li dok-dok awa, a'ata vigi ma li dok-dok a'a, kay a nigi ma cuk gaa kuɗ kitatɗi.

¹³ La sa jargiya ka hay lasta, nam ma siɗawa, la sa jargiya ka hay firita, nam ma gi nul ma gi-deɓta.

¹⁴ La sa jargiya ka moyo, nam ma yi sa maariyana vi ziyda-Lawna, kay nisi ma siɗaw kalamu, kay nisi ma ɦok mul kalamu hay semda vi Bum-Sumuna;

¹⁵ siɗawta ta hiɗi vida ma gut kuɗ sa ma moyna, Bum-Sumuna ma fokom kulo'o, la nam li sulukawa, Bum-Sumuna ma vulum gida.

¹⁶ Hamgi sulukŋa vigi goy jar-tuwgiya, siɗawgi kay tuwgiya kaw, kay nigi ma yer goyo, siɗawta ta hiɗi donota vi sa ma ɗigera na' li lop ŋolo.

¹⁷ Eliyas nam mi sana ki nay nala kaw, nam siɗaw hiɗi dono'o kay niyn ma siɗi, nala hay busat ɦidi hiɗi til karkiya niyn may si gaa kay nagatɗi.

¹⁸ Bugolda lo nam siɗawa, dukalawna vul niyna, nagata vuɗ jafna kaw.

¹⁹ Ɓosiyonna, la sa jargiya cal goy gine hiɗi gasita, la sa hena hotomiyawa,

²⁰ Nigi ma wi ala, sa ma hot sa ma sulukŋa ay hay hagata ta nam cal goy haya' pata, nam suɗ ciwta vi sanawa kay mitta, nam vul gidawa kay sulukŋ ŋolo ŋolo kaw.