YAKUB 4 - BIBALDA TA PELDETTA

Dur hiɗi minda vi sliwna

¹ Duura hiɗi cirepta may jargi arige pa? Nam may goy vi minda vi sliwna vigiya ma dur hiɗi ɓetna vi tuwginɗi su?

² Nigi niŋa slena, may nigi fumɗi, nigi ci mati, nigi gar slena, may nigi as fum noŋɗi; nigi cirep tuwgiya, dur tuwgiya kaw, may nigi as fi va noŋɗi, kay mige nigi min garɗi.

³ Nigi siɗawa, may nigi fiɗi, kay nigi siɗaw joo'o, kay nigi vatam goy hay minda vi sliwna vigiya.

⁴ Nigi sa bay-gasina, a bonota vi nagata kayni ɦeɗem kat Lawna nigi may wi naɗi su? Kay na'ta sa ma min li bono hiɗi nagata nam ka gaw hiɗi Lawna.

⁵ Nigi var ala ɗot di kayn goy waa'a su? Na' di ala: Ŋusta ta Lawn vula' hayaya nam dara' hiɗi hunayta.

⁶ May nam vul slugota ŋol suwa, kay ɗot di ala: Lawna ka gaw hiɗi sa subur tuwsina, may sa hot yisi gaana nam vulsi suburta.

⁷ Hotgi yigi gaa kuɗ Lawna, may fokgi kulo'o kay Matna, nam ma hingiya, pira kaw.

⁸ Nigiyay goboy tam Lawna, nam ma ma goboy hiɗi nigiya kaw, muzgi ɓigi goyo, nigi sa sulukŋa, porgi dikgi goyo, nigi sa milena!

⁹ Yorgiya, tiygiya, tiygi tuwgiya kaw; hin cenda vigiya muɗ goy tiyta, hin firita vigi muɗ goy yorta.

¹⁰ Hot yigi gaa vok Bum-Sumuna, nala nam ma sligi yigi kulo'o.

¹¹ Ɓosiyonna, digi va ma joo kay tuwgiɗi, la san di va ma joo'o lebo ka kitat kay ɓasulumna, nam ka di joo'o, ka kitat kaw kayni kay vun-ma-gatna. La naŋ ka kitat kay vun-ma-gatna, naŋ may mi sa ma li kuɗ vun-ma-gatnaɗi, may mi sa ma ka kitata.

¹² Nam ma vul vun-ma-gatna, ma ka kitata kaw ka kepe, mi namu ma as suɗ sana lebo bam goyo; may naŋu, naŋ gige kay ka kitat kay ɓasuŋŋa?

Tam sa gar farayna

¹³ May wulini nigi sa di'e: Vaydi lebo jifini, numa min tuɗ hay hoyok-ziyn ɗawni, lak haya ir busat kepe kay dok yam farayna,

¹⁴ May va ma min li hay irita vigi grawta nigi may wumɗi. Nigiya ki noosna ma san wum ir liyn neeɗa ɦawa, bugolda may loɗi nala.

¹⁵ May ŋaata nigi ma di ala: La Bum-Sumun min hinma iriya, numa li van kayni lebo van kayni.

¹⁶ May wulini hay jigal-tuwta vigiya, nigi ka sli yam tuwgi kulo'o, subur-tuwta ta ki kayn nala kafta na' joo'o.

¹⁷ La san wi kay li ŋaa'a may nam lumɗi ni, sulukŋa valamu ka hay kayni.