YAKUB 2 - BIBALDA TA PELDETTA

Sli yam sa hawn kulo'o

¹ Ɓosiyonna, vida vigiya hay Bum-Sumuna vaya Yesu Kristu nigi ma rigasa' hiɗi poŋ-irta vi sumunɗi.

² Kay la san co hay dakka vigiya hiɗi jaɓ ma ora, hiɗi sligar ma wilen kaw, la hena ma hawna co jargi zaw hiɗi sligar ma jireɓayna;

³ la nigi tun ŋalda vigi kay nam ma cuk sligar ma wilena, la nigi dum ala: Naŋu musaŋ tani hay liy ma ŋaana, may nigi di tam sa ma hawn ala: Naŋu, colaŋ kulo tani, lebo musaŋ kay va ma tun sem kalamna ni,

⁴ nigi la' kayni ti poŋ-irta jar-tuwgiɗi su? Nigi muɗi kayni si sum sa ka kitata hiɗi varta joota ɗisu?

⁵ Humgi tige, ɓosiyon sa hayan kigina, Lawna vilek sum sa hawnawa hay nagat tani, kay nisi ma muɗ faraya hay vida, kay yaw mulda ta nam deŋa' tam nisi sa minimna kawɗi su?

⁶ May nigiya, nigi ɗuw sa hawna birek-ceke, sa farayna ka curoɗgi ɗisu? Nisi ka nargi vok kitana kaw ɗisu?

⁷ Nisi kayni si sa ŋul semda ŋaata ta yiy tigita ɗisu?

⁸ Gasiya, la nigi li kuɗ vun-ma-gatna vi mulla hay liyamu ki ɗot di nala ala min sugoloŋu ki tuwaŋ nala, nigi li ŋaa'a.

⁹ May la nigi poŋ ir sumuna nigi li sulukawa, nigi ma vi ala nigi raw vun-ma-gatnawa goyo.

¹⁰ May la san gigekaw vi kuɗ vun-ma-gatna kafe, may nam li suluk tam mara kep jaramu, kitat ka kalamu kay vun-ma-gatna kafe.

¹¹ Nam ma di ala naŋ li zlata-buloɗi, nam di kaw ala naŋ ci matɗi. La naŋ li zlata-buloɗi may naŋ ci mati, naŋ muɗi sa ma raw vun-ma-gatna goyna.

¹² Nigi ma lawa, li lop kaw ki sum sa kitat ma kaays kisiya kuɗ vun-ma-gatna vi butta-goyta nala,

¹³ kay kitata ma kaays hiɗi bay kir-hawta kay nam ma li bay kir-hawta, kir-hawta kol kay kitata.

Vida hiɗi lopna

¹⁴ Ɓosiyonna, la san di ala vida valam ka'a, may lopna mayɗi kayn ŋaat arige? Vida fi suɗum goy su?

¹⁵ La ɓasuy ma juf kla ta ca kla, la nisi ka goy nala'a, la va ma nisi tum vaydi mayɗi,

¹⁶ la sa jargi disi ala tuɗgi migi ŋaa'a, hobgi haygi kaw, may la bay vulsi sle ma ŋom ŋil tuwsina ni, ŋaat arige?

¹⁷ Vida kaw nala, la lopna va'a mayɗi, na' kaw mitawa.

¹⁸ May la san di ala: Naŋu vida vaŋ ka'a, may nanu lopna van ka'a ni, ɗekan kay vida vaŋu ta bay lopna, may nanu hiɗi lopna vanu nan ma ɗekan kay vida vanu.

¹⁹ Naŋ vi ala Lawn ka kepe, naŋ li ŋaa'a, fuliyan kaw vi nala, may nisi ka li nari.

²⁰ May naŋ sa ma waana, a vida bay lopna na' getiya, naŋ wi nala su?

²¹ Abraham buya fi ɗigerta kayni kuɗ lopna, hay li ma nam li ɗifin kulo kay giwin-ma-ɗifinna hiɗi goora valamu Isaak naɗi su?

²² Naŋ wi ala vida muɗ dono'o hiɗi lopna, kuɗ lopna, vida muɗi goy pasiyaki kaw.

²³ Nala vun-ɗota zawn ma hoba, na' ta di ala: Abraham vi kuɗ Lawna, kayn ŋaɓay kalamu ki ɗigerta nala. Nisi yum ala bana Lawna kaw.

²⁴ Nigi wi ala sana muɗ ɗiger kuɗ lopna, may kuɗ vida kepɗi.

²⁵ Ki cata viyuwta Rahab nala, na' muɗi goy ɗigere kuɗ lopna, kay sa cuki ay sunna na' visi ŋaa'a, hay hotta na' tunsi irsi hay hagat tara'a kaw, naɗi su?

²⁶ Kay ki tuwna bay ŋusta mitiya, nala vida bay lopna kaw mitiya.