TITUS 2 - BIBALDA TA PELDETTA

Lopna ma vo hay ziyna

¹ May naŋu, naŋ ma dum mi yoboy ma tap hiɗi hatta ta gasita.

² Naŋ ma di tam sa maariyana a nisi ma lak ŋali, sum sa hormo'o, hiɗi varta yalda, peldete hay vida, hay minda, hay ŋalda kaw.

³ Naŋ ma di tam boy sa busata visi liy ŋolo kay nisi ma poy hiɗi hagata peldetta, di yoboy ma tefleɗi, muɗ tuwsi gorvo vi dolayɗi; nisi ma vul hatta ta ŋaata,

⁴ kay nisi fi hat boy sa gurayna kay min jufaysiya hiɗi gurona visiya,

⁵ a var yali, lak cet-cete, li lop ma vona ŋaa ŋolo, hum kuɗ jufaysiya, kay sa fi ŋul yoboyna vi Lawnɗi,

⁶ Jufay sa joriyona naŋ ma gatsiya nala kaw a nisi ma li yali hay slen pet,

⁷ naŋ kay tuwaŋ kaw ɗek tuwaŋ goy hiɗi lop ma ŋaana a nisi fi sli kuɗaŋu hay lop ma ŋaana, a naŋ ma vul hatta ta gasita, ta nagayta,

⁸ Daŋgi mi yoboy ma hay liyamna, ma sa as di joo kalamɗina, kay sa gawt kaŋŋa ma muɗ zulo'o, a nisi ma fi kay di va ma joo kayɗi.

⁹ Sa gorvona naŋ ma disi kay nisi ma hum kuɗ mulaysin ŋaa'a hay slen pet, li tuwsi kirsi jifiya, ci-way hiɗi nisiɗi kaw.

¹⁰ a ɦod slen goyɗi, may ɗek lop ma gasina goy dok-doko, kay sli yam hatta vi Lawna ma su'da vay kulo'o hay slen kaf.

Slugota vi Lawna maawa goy haraŋi

¹¹ Slugota vi Lawna ta su'da vi sumun kaf may goy haya' pata, ɗek tuwa'awa goy haraŋi.

¹² Na' hataya kay nay ma hin poyta-liwista goyo, nay ma hin darta vi nagat goyo kaw; a nay ma lak hay nagata tanta hiɗi varta ta yali, ɗigere hiɗi poy ŋaa'a kaw,

¹³ Hay li ma nay cub cubta-sle'ta hiɗi ɗek-goyta vi gajijita vi Lawna vay ma ŋolla ma su'da, Kristu Yesu.

¹⁴ Nam ma vul tuwamawa goy kaya, kay butay goy hay jiw-zlata kaf, lay a nay ma muɗ goy peldete, muɗay si sumuna valamu kay tuwamu, sa ciwer hay lopna ma ŋaana.

¹⁵ Kay na'ta, kusaŋ yoboyna, vulaŋ gatta, lawaŋ sumuna hiɗi dono'o. Hin sa ɗuwaŋ birek-cekɗi.