SA LEVITNA 9 - BIBALDA TA PELDETTA

Ɗifin ma jewna ma Aaron hiɗi gurona valam lumna

¹ Hay buurta glafandita, Musus yi Aaron hiɗi gurona valamu, hiɗi sa maariyana vi Israyel.

² Nam di tam Aaron ala: Naŋ ma vi goor-put ma joriyo'o kay li ɗifin ma poora, vi ɦu-gamala'a kay li ɗifin ma ŋal-goyna, nam ma' kaf ma li hiɗi moy talamɗi, nigi ma lum ɗifini vok ir Ma-Vatɗina.

³ Naŋ ma di tam gurona vi Israyel ala: Nigi ma vi ɦu-ŋeke, kay li ɗifin ma poora hiɗi namu, vigi goor-put kepe, vigi goor ɦu-dimi kep kaw, busata valam kep kepe, moy may talamɗi kaw, kay li ɗifin ma ŋal-goyn hiɗi namu.

⁴ Put-guju kepe hiɗi ɦu-gamala kepe, kay ɗifinna vi lop ma slugona, kay lum goy peldete vok ir Ma-Vatɗina; hiɗi ɗifin ma hiliɓi hiɗi mula. Kay vaydi Ma-Vatɗin ma vul tuwam kirgiya.

⁵ Sle ma Musus di kalamna nisi tuɗum goy vun guɗuk ma fi-tuwna; tokŋa kaf co goboyo, nisi lak goy vok Ma-Vatɗina.

⁶ Musus di'e: Nigi ma li kuɗ slen ma Ma-Vatɗin di kalamna; nala gajijita vi Ma-Vatɗin ma vul tuwa' kirgiya.

⁷ Musus di tam Aaron: Naŋ ma co goboyo tam giwin-ma-ɗifinna, naŋ ma li ɗifinna vaŋ ma poora hiɗi ɗifin ma ŋal-goyna, naŋ ma li poora kaŋ naŋu, kay sumun kafe kaw; naŋ ma li ɗifin kay sumun kafe, naŋ ma li poor kisiya, ki Ma-Vatɗina vul hagat nala.

⁸ Aaron co goboy tam giwin-ma-ɗifin, nam ŋat goor-putna kay ɗifinna ma por tuwamna.

⁹ Gurona vi Aaron maram busuwna, nam jiyob cita-ɓalam gaa hay busuwna, nam set busuw mara kulo tam giwin-ma-ɗifinna, busuw hena nam ɦokom gaa sem giwin-ma-ɗifinna.

¹⁰ Mul-sliwna, gles ma ma'na hiɗi mul ma kay dukŋa vi ɦu ma poora nam lakam kulo kay giwin-ma-ɗifinna kaf, ŋalam goyo, ki Ma-Vatɗina vul hagata tam Musus nala.

¹¹ May sliwna hiɗi bakŋa nam tuɗum goy gine hiɗi guruna, ŋalam goyo.

¹² Aaron ŋat ɦu ma ŋalam ɗifinna, gurona valam vulum busuwna, nam yamam goy tam tuw giwin-ma-ɗifinna kafe.

¹³ Nisi maram ɗifin ma ŋal-goyna ma iram kaay goy ne'ne'na, hiɗi yamda kaw, nam ŋalam kulo kay giwin-ma-ɗifinna.

¹⁴ Nam muz ruwatna hiɗi gayn goyo, nam lakam kulo kay giwin-ma-ɗifinna, ŋalam goyo.

¹⁵ Bugol kayni nam li ɗifin kay sumuna, nam vi ɦu-ŋekŋa kay li ɗifin ma poora kay sumuna, nam ŋatamu, li ɗifin ma poora hiɗi namu ki ɦu ma nam ŋatam jewn nala.

¹⁶ Nam li ɗifin ma ŋal-goyna, li ɗifinna kuɗ gatta ta colita.

¹⁷ Nam mar futuwna, hob way-ɓalamu, cukum kulo kay giwin-ma-ɗifinna, ŋalam goyo, kayn di ala ɗifin ma ŋal-goyna ma graw culumta hayɗi.

¹⁸ Nam ŋat put-gujuna hiɗi ɦu-gamalana, kay li ɗifinna vi lop ma slugon kay sumun hiɗi namu. Gurona vi Aaron maram busuwna, nam yamam goy tam giwin-ma-ɗifinna noŋ kafe.

¹⁹ Nisi maram mula vi put-gujuna hiɗi ɦu-gamalana, giɗera, mul ma tam ruwatna, glesna ma mana, mul ma kay dukka;

²⁰ nisi tun mula kay war-digŋa, nam ŋal mula kulo kay giwin-ma-ɗifinna.

²¹ Aaron sli war-digŋa hiɗi bigiy ma jufna vi ɦuna, nam muɗum galam kulo vok Ma-Vatɗin kaf ki Musus vul hagat nala.

²² Aaron yaw ɓalam kulo'o, gi bol kay sumuna. Hay li ma nam li ɗifin ma poora, ɗifin ma ŋal-goyna hiɗi ɗifinna vi lop ma slugon kaf lina, nam jik goy gaa'a.

²³ Musus hiɗi Aaron cuk hay guɗuk ma fi-tuwna. Hay li ma nisi hotay goy hotna, nisi gi bol kay sumuna. Ki kayn nala gajijita vi Ma-Vatɗina vul tuwa' goy kir sumun kafe.

²⁴ Kut kalay goy vi Ma-Vatɗin pa, ɗifin ma ŋal-goyna hiɗi mula ma ka tuni kay giwin-ma-ɗifinna na' ŋalam goy kafe. Sumun kaf wi kayni, nisi kaf firi digi-digi', nisi dab voksi gaa kay nagata.