SA LEVITNA 5 - BIBALDA TA PELDETTA

¹ Hay li ma san wi van hiɗi iramu, may la nam yi va kalam vok kitat ala van kayni nam wumɗi lebo nam humiɗi, nam li sulukawa, joota valam tuni kalamu.

² Hay li ma san jo ɓalamawa tam va ma liwisi bay wida, ki ŋumna vi muuriyan ma liwisna nala, la mi muur ma fulu, lebo ma vo'o, lebo muur ma ɦarmatna kaw, nam kay tuwam kaw ma muɗ liwisi, nam muɗ tuwamawa joo'o.

³ La nam tun ɓalamawa tam sa ma liwisi bay wi goy ŋaa'a jewe, la nam wi kaynawa bugolda, nam muɗi joo'o.

⁴ Hay li ma san di va waa ɗar' kay li va ma ŋaa'a lebo va ma joo'o, bay var goy ŋaa'a jewe kay kayni, la humam gumawa bugolda, joot ka kalam kuɗ kayni.

⁵ La sa muɗ tuwamawa joo'o hiɗi suluk mara'a jar namna cani, nam ma ham sulukŋa valam goyo.

⁶ Nam ma li ɗifin ma kay joota tam Ma-Vatɗina kuɗ suluk ma nam lumna: Nam ma vi ɦuta ta cata, la ti ɦu-dimiya lebo ɦu-mee'e kaw, ki ɦu ma poora nala. Mul-ma-ɗifinna ma li poora kay sulukŋa valamu.

⁷ La donom ma fi ɦu-dimiya lebo ɦu-mee mayɗi, nam ma vul gukŋa ma' lebo guk-gabayn ma', kay li ɗifin ma kay joota tam Ma-Vatɗina hiɗi namu, kep ki gukka ta poora nala, kep ki ɗifin ma ŋal-goyna nala.

⁸ Nam ma maram tam mul-ma-ɗifinna, gukka ta poora nam as la' ɗifin jewe. Mul-ma-ɗifinna, nam ma mun yam gukka goyo hiɗi tirekemu, may ɓurawa' goyɗi;

⁹ nam yam busuwna vi gukka ta poora hay gal ma kepna vi giwin-ma-ɗifinna, dir busuwn ma hin goyna nam ma yamam gaa sem giwin-ma-ɗifinna: Kayni mi ɗifinna ma poora.

¹⁰ Lay hena nam ma ŋalam goyo, ki gatta tuni nala. Mul-ma-ɗifinna ma li poora kay suluk ma nam lumna ɗawn ki kayn nala, nam ma fi gida may.

¹¹ La donota valam ta fi guk ma ma'na lebo guk-gabayn kaw tayɗi, nam ma mar futuwna hay gal ta doogota vi dutta-kusta, kayni mi ɗifin ma kay sulukŋa valamna, ki ɗifin ma poora nala; nam as yam mul kalamɗi, nam may mar urdi ma ŋalayɗi kaw. Kay kayni mi ɗifin ma poora.

¹² Nam ma maram tam mul-ma-ɗifinna, mul-ma-ɗifinna ma yaw mara'a hob way ɓalam hiɗi namu, kay gi-humda, nam ma ŋalam kulo'o kay giwin-ma-ɗifinna, ki ɗifinna ma ŋalay hay kuta vok ir Ma-Vatɗin nala: Kayni mi ɗifinna ma kay sulukŋa.

¹³ Ki kayn nala mul-ma-ɗifinna ma li poora kay sa namna kuɗ suluk ma nam lum tam va kep jar hen cani, nala nam ma fi gida. Dir ɗifinna ma hin goyn ɗawni vi mul-ma-ɗifinna, ki ɗifinna ma hay vulda nala.

Gatta kay ɗifin ma ŋal-goyna hiɗi vulda

¹⁴ Ma-Vatɗina di tam Musus ala:

¹⁵ Hay li ma san li law ma bay-ɗigerawa, la nam li suluk ma bay-widawa kat slen ma vuli goy ir mi Ma-Vatɗina, nam ma li ɗifin ma kay joota kat Ma-Vatɗina kay sulukŋa valamu, nam ma vi ɦu-gamalana ma bay moyna, vum kuɗ hayamu, ŋram gusta valam hiɗi gurju sikella ma ka li lop hiɗi nam hay liyn ma peldetna.

¹⁶ Va ma peldetna ma nam li suluk hiɗi namna, nam ma hotom goyo, nam ma gi gal ma vaslna vunam lo; vulum mi mul-ma-ɗifinna, mul-ma-ɗifinna ma li poor kalamu hiɗi ɦu-gamala ma nam vulum goy ɗifin kay joota, nala nam ma fi gida.

¹⁷ La san li sulukawa bay wida kat vun-ma-gatna vi Ma-Vatɗina mara kepe, la nam li slen ma sa as lumɗinawa, nam muɗi joo'o, joota valam tuni kalamu.

¹⁸ Nam ma mar ɦu-gamalana tam mul-ma-ɗifinna, kay li ɗifin ma kay sulukŋa. Nam ma maram mi ɦu-gamalana ma moy may talamɗina. Nam vum jar fok hena kuɗ minda valamu. Mul-ma-ɗifinna ma li poora kalamu kuɗ joota ta nam la' bay wa'ta, nala nam ma fi gida.

¹⁹ Kayni mi ɗifin ma kay sulukŋa. Kay san kayni muɗ tuwam joo'o vok ir Ma-Vatɗina.

²⁰ Ma-Vatɗina di tam Musus ala:

²¹ Hay li ma san li sulukawa, la nam li law ma bay-ɗigerawa kat Ma-Vatɗina, hay li ma nam ɗut sugolomna kay va ma hay ɓalam ŋoma, va ma nam num niya, la kuɗ va ma kuliya lebo va ma zletem goyna,

²² la nam puw vunamawa kay va ma ba goyo ma nam fumna, la nam yi va kalam goy kay van waa'a, a van kayni muɗum suluku;

²³ hay li ma nam li suluk ki kayn nala, nam muɗi joo'o kaw, va ma nam kulumna hiɗi ma nam zletem goy hiɗi mileta, va ma vuli hay ɓalam kay ŋomna hiɗi va ma ba goyo ma nam fumna kaf nam as hotom goyo,

²⁴ lebo la va mige kaw ma nam yi va kalam kuɗum bay liyamna. Nam ma hot va namna goy kafe, gi gal ma vaslna vunamu, kot vulum goy mi mulamna, hay buurta ta nam min li ɗifin ma kay sulukŋa de.

²⁵ Nam ma mar ɦu-gamalana ma bay moyna tam mul-ma-ɗifinna. Nam as li ɗifin ma kay joota tam Ma-Vatɗina kay suluk ma nam lumna. ɦu namna nam vum jar fok hena kuɗ minda valamu.

²⁶ Mul-ma-ɗifinna ma li poora kalamu vok Ma-Vatɗina kay suluk ma nam lumna. La nam lum malam mi suluk mige kaw nam ma fi gida.