SA LEVITNA 4 - BIBALDA TA PELDETTA

Ɗifin ma kay sulukŋa

¹ Ma-Vatɗina di tam Musus ala:

² Naŋ ma di tam gurona vi Israyel ala: La san li sulukawa kat vun-ma-gatna vi Ma-Vatɗin mara kep bay minda valamu, la nam li sle ma telaynawa,

³ la li suluk kayni mi mul-ma-ɗifinna ma mul ɦoki kalamna, la hiɗi kayni nam muɗ sumunawa joo'o, nam ma li ɗifin tam Ma-Vatɗina, kay por suluk ma nam lumna hiɗi put ma joriyona ma moy may talamɗina.

⁴ Nam ma nar putna goy vun guɗuk ma fi-tuwna, vok ir Ma-Vatɗina; nam ma tun ɓalam kay put namna, nam ma ŋatam vok ir Ma-Vatɗina.

⁵ Mul-ma-ɗifinna ma mul ɦoki kalamna ma yaw busuw put-gujuna, nam ma naram hay guɗuk ma fi-tuwna;

⁶ nam ma jo cita-ɓalam hay busuwna, nam ma yam busuwn goy sem siɗiya vok ir Ma-Vatɗina, goy ɗiger vok sligar-gaɓayna vi liyn ma peldetna.

⁷ Mul-ma-ɗifinna ma jo busuwn tam miyokŋa vi giwin-ma-ɗifinna ma ŋal urdi ma hisna kulo kalamna, ma ka ɗiger vok Ma-Vatɗina hay guɗuk ma fi-tuwna; busuwna vi putna noŋ kaf nam ma yamam gaa sem giwin-ma-ɗifinna ma ŋal farayn kulo kalamna, ma ka hay vun guɗuk ma fi-tuwna.

⁸ Put namna ma poora nam ma yawam mulam goy kafe, mul ma tam ruwatna hiɗi mul ma tapay talamna kafe,

⁹ glesna ma ma'na, mul ma talamna, ma ŋuyi tam furta, mul ma tam glesna, nam ma kaam jaram goy hiɗi glesna,

¹⁰ ki yaw sle ma hayna vi luway jufayna kay ɗifinna vi lop ma slugona nala, mul-ma-ɗifinna ma ŋalam kulo kay giwin-ma-ɗifinna ma ŋal farayn kalamna.

¹¹ May bak put-gujuna, sliwam noŋ kaf kaw, hiɗi yalamu, kiyoromu, ruwatamu hiɗi suɗoyomu,

¹² put-gujun noŋ kaf nam ma naram goy gine hiɗi guruna, hay liy ma bay-gese, liyn ma ko butuw-kun hayamna, nam ma burum kulo kay guna, ŋal kut kuɗumu; ma ŋalam kulo kay difir-fira.

¹³ La sum sa Israyella kaf li sulukawa bay minda hiɗi bay-wida, la nisi li slen ma as lumɗinawa kat vun-ma-gatna vi Ma-Vatɗina mara kepe, la nisi muɗ tuwsiyawa joo'o,

¹⁴ la suluk namna diram patawa goyo, tokŋa noŋ kaf as li ɗifin hiɗi put-joriyo'o kay por tuwsiya, put namna ma tuɗum goy vok guɗuk ma fi-tuwna.

¹⁵ Sa ŋulona vi Israyel ma tun ɓisi kay putna vok ir Ma-Vatɗina, put namna ma ŋatamu vok ir Ma-Vatɗina kaw.

¹⁶ Mul-ma-ɗifinna ma mul ɦoki kalamna ma nar busuwna vi put-gujuna hay guɗuk ma fi-tuwna;

¹⁷ nam ma jiyob cita-ɓalam gaa hay busuwna, nam ma yamam goy sem siɗiya vok ir Ma-Vatɗina, goy ɗiger vok sligar-gaɓayna.

¹⁸ Nam ma tun busuwn tam miyokŋa vi giwin-ma-ɗifinna ma ka vok ir Ma-Vatɗina hay guɗuk ma fi-tuwna; busuw putna nam ma ɦokom gaa sem giwin-ma-ɗifinna ma ŋal farayna, ma ka goy vun guɗuk ma fi-tuwna.

¹⁹ Mula vi put-gujuna nam ma yawam goy kafe, nam ma ŋalam kulo'o kay giwin-ma-ɗifinna.

²⁰ Nam ma lum ŋray ca ki nam li put ma poora nala kaw. Ki kayn nala mul-ma-ɗifinna ma porsiya, nisi ma fi gida kaw.

²¹ Nam ma nar put-gujuna goy gine hiɗi guruna nam ma ŋalam goyo ki put ma jewna nala kaw. Kayn mi ɗifinna ma poora kay tokŋa.

²² La li suluk kayni mi sa ma ŋolo jar sa Israyella, la nam li suluk ma kuɗ hayamɗinawa kat vun-ma-gatna mara kepe vi Ma-Vatɗina Lawna valamu, la nam li sle ma san as lumɗinawa hay li ma nam muɗ tuwamawa joo'o,

²³ la suluk ma nam lumna diram patawa goy kiramu, nam ma li ɗifin hiɗi ɦu-ŋekŋa ma moy may talamɗina.

²⁴ Nam ma tun ɓalam kay ɦu-ŋekŋa namna, nam ma ŋatamu hay liyn ma ŋat faray ma ŋalam goyna vok ir Ma-Vatɗina. Kayni mi ɗifinna ma poora.

²⁵ Mul-ma-ɗifinna ma yaw busuwna vi ɦu-ma-poora hiɗi cita-ɓalamu, nam ma tunum tam miyokŋa vi giwin-ma-ɗifinna ma ŋal farayna, nam ma yam busuwna gaa sem giwin-ma-ɗifinna ma ŋal farayna.

²⁶ Mul-ɦuna nam ma ŋalam kulo kay giwin-ma-ɗifinna noŋ kafe, ki mula vi ɗifinna vi lop ma slugona nala. Ki kayn nala mul-ma-ɗifinna ma por sulukŋa vi sa ma ŋol namna, nam ma fi gida may.

²⁷ La li suluk ma kuɗ hayamɗin kayni mi sa ma ɦawa'a, la nam li va ma sa as lumɗinawa kat vun-ma-gatna vi Ma-Vatɗina mara'a kepe, la nam muɗ tuwamawa suluku,

²⁸ la suluk ma nam lumna diram patawa goy kiramu, nam ma li ɗifini hiɗi ɦu-meeta ta cata ta moy may ta'ɗi, kayn kay suluk ma nam lumna.

²⁹ Nam ma tun ɓalam kay ɦu ta poora, nam ma ŋata'a hay liyn ma ŋat faray ma ŋalam goyna.

³⁰ Mul-ma-ɗifinna ma yaw busuw ɦu na'ta hiɗi cita-ɓalamu, nam ma tunum kulo'o tam miyok giwin-ma-ɗifinna ma ŋal farayna, nam ma yam busuwn gaa sem giwin-ma-ɗifinna.

³¹ Mul-ma-ɗifinna ma yaw mula kaf goyo, ki yaw mula vi ɗifinna vi lopna ma slugona goy nala, nam ma ŋalam kulo'o kay giwin-ma-ɗifinna, hista valam ma li ŋaa'a ŋolo kir Ma-Vatɗina. Ki kayn nala mul-ma-ɗifinna ma li poora kay sa namna, nam ma fi gida kaw.

³² La nam min li ɗifin hiɗi goor ɦu-dimina kay por sulukŋa valamu, nam ma vula' ti ta ca'a ta moy may ta'ɗi.

³³ Nam ma tun ɓalam kay ɦu na'ta, nam ma ŋata' kay li ɗifin ma poora hay liyn ma ŋat faray ma ŋal-goyna.

³⁴ Mul-ma-ɗifinna ma yawa' busuwa' hay cita-ɓalamu, nam ma saw hen kulo'o tam miyokŋa vi giwin-ma-ɗifinna ma ŋal farayna, nam ma yam busuwn kaf sem giwin-ma-ɗifinna.

³⁵ Mul-ma-ɗifinna ma yaw mul-sliwna kaf goyo, ki yaw mul goor ɦu-dimina goyo hay ɗifinna vi lop ma slugona nala, nam ma ŋalam kulo kay giwin-ma-ɗifinna, ki ɗifin ma ŋalay hay kuta vok ir Ma-Vatɗina nala. Ki kayn nala mul-ma-ɗifinna ma li poora kay suluk ma sa namna lumna, nala nam ma fi gida kaw.