ROMENA 4 - BIBALDA TA PELDETTA

San muɗ ɗigere kuɗ vida, ɗota di nala

¹ La nala nay ma di mige kay buya Abraham? Nam fum kuɗ sliwna mi mige?

² Kay la Abraham fi ɗigerta kayni kuɗ lopna, nam fi subur tuwamu. May vok Lawna nam may naɗi;

³ ɗota di mige? Na' di ala Abraham vi kuɗ Lawna, kayni ŋaɓis kalamu ki ɗigere.

⁴ May tam sa ma li lopna, wurakŋa valamu may ŋaɓi ki slugo'o naɗi, may mi va ma nam fum kuɗ lopna.

⁵ May nam ma lopna valam mayɗi, may vi kuɗ nam ma muɗ sa joon goy ŋaa'a vida valamu ŋaɓi ki ɗigere nala.

⁶ Nala kaw David law kay sle'ta vi san ma Lawn muɗum goy ɗigere bay lopna,

⁷ di'e: Sle'ta kay nisi sa fi gidawa kay jiw-zlata visiya, sa sulukŋa visi ɦasay goy ɦas.

⁸ Sle'ta ka kay sa ma Bum-Sumuna ŋaɓ sulukŋa kalamɗina.

⁹ Sle'ta na'ta ta nam di ka'ta kayni kay sa kay-gosayn tuta lebo kay sa bay ka-gosay kaw su? Kay numa di'e: Vida ŋaɓi tam Abraham kuɗ ɗigerta.

¹⁰ Vida ŋaɓi talamu hay liyn marige? Hay li ma nam kay-gosayna lebo hay li ma nam bay kay gosay tuwan su? Kayni hay li ma nam bay ka gosay tuwana.

¹¹ Nala ka-gosayta tuni talamu, ki soona vi ɗigerta ta nam fa' vida nala hay li ma nam ay bay ka gosay tuwa'a. Kay nam fi mus mi bum sa viyna kaf, la nisi bay ka-gosaya kaw, kay ɗigerta fi ŋaɓis kisiya.

¹² Namu mi bum sa kaay-gosayna kaw, nisi sa kaay gosay ɦawaɗi, may sa sli hagata vi vida ta ay hay Abraham buya, hay li ma nam bay ka gosay tuwa.

Vida vi Abraham

¹³ Kay na'ta, Abraham hiɗi jafna valamu yaw nagat voco kayni kuɗ vun-ma-gatnaɗi, may kuɗ ɗigerta vi vida.

¹⁴ Kay la san yaw vocot ɗawn kuɗ vun-ma-gatna, vida muɗi goy waa'a, dita-ŋaɓayta muɗi va ma waa'a kaw.

¹⁵ Kay vun-ma-gatna mar ɦiyda, may hay li ma vun-ma-gatna mayɗi, raw-goyta tayɗi kaw.

¹⁶ Kay na'ta nam fa' kuɗ vida, kay nam fa' ki slugota nala, kay dita-ŋaɓayta sumun kaf ma fa'a, tam sa kuɗ vun-ma-gatna ɦawaɗi, may tam nisi kaf sa ka hay vida vi Abraham ma buy nay kafna.

¹⁷ Ki ɗo'ay nala: Nan tunaŋawa bum jaf-sumuna ŋolo. Nam mi buy nay kafe. Vok Lawna ma nay vi hayamna ma vul irita mi sa mitina, yi sle ma mayɗina kay nam muɗ ka'a.

¹⁸ Nam cub va ma san as cubumɗina, nam vi'e, ki kayn nala nam muɗ goy bum jaf-sumuna ŋolo, ki dita diy nala ala: jafna vaŋu ma muɗ ki kayn nala.

¹⁹ hiɗi bay-maŋga hay vida, nam sar tuwamu ki miti nala, kay nam liy busat ir kis, ziy-goora vi Sara roŋiya kaw.

²⁰ May kay sle ma ma Lawna ŋaɓami ŋaɓna, Abraham giriŋɗi, min mus hay bay-vidaɗi kaw, may nam vi dono'o, nam vul suburta tam Lawna.

²¹ Kay nam wi goy gasi ala sle ma Lawna ŋaɓam talamna nam as hobom vunamu kaw.

²² Kay na'ta kayni ŋaɓi kalamu kuɗ ɗigerta.

²³ May ɗota ta ala: Kayni ŋaɓi kalamu ta, na' may kalam nam kepɗi.

²⁴ May kay nay kaw, nay sa van kayni ŋaɓi kaya, nay sa vi hay nam ma day Yesu Kristu Bum-Sumuna vaya goy hay mitta pa.

²⁵ Nam ma ay vuli goyo kay jiw-zlata vaya, dayay kulo'o kay nay ma fi ɗigerta kaw.