ROMENA 3 - BIBALDA TA PELDETTA

Yudiyana as suw segen hiɗi mige?

¹ La nala, sa Yudiyana suw segen hiɗi mige? Lebo ka-gosayta lum ŋaa'a suw mi mige?

² Nisi asay misiya: kuɗ ta ala yoboyna Lawna ay vuli jewe misi nisi sa Yudiyana.

³ Mige lo? La segena ay bay vi'e, bay-vida visiya as muɗ gasita vi Lawna goy waa'a su?

⁴ May noŋɗi, nay ma wi Lawna ki nam gasiya nala, nay ma wi san gigekaw ki nam mi ma sinda nala. Ki ɗo'ay nala: Kay naŋ ma fi ɗigerta hay dita vaŋu, Kitata vaŋ ma vi'e kaw hay li ma naŋ co vun kitata.

⁵ May la bay-ɗigerta vaya mar ɗigerta vi Lawna goy haraŋi, nay ma di mige? Lawna nam bay-ɗigere hay li ma nam mar ɦiyda valam kaya su? -- Nan ka law ki varta vi san nala --

⁶ May noŋɗi, kay la nala, Lawna fi ka kitata kay sa nagatna ɗawn arige?

⁷ May la kuɗ sinda vanu, gasita vi Lawna jor voko kuɗ gaŋeraŋa valamu, nala kitat ma kaays kan lo ki sa ma sulukŋa nala kay mige?

⁸ Nala nay ma li joota kay ŋaata fi ma kuɗ kayni su? Ki nisi ka ŋulma'a kuɗ kayni nala, segen ka di ala numa hat kayni goyo kaw. Nisiya kitat ko kisiya hay liya'a.

Sulukŋa ka kay sumun kaf

⁹ Mige lo? Nay ŋolo suwsi su? May noŋ ne'ɗi: kay numa wi goy ala la Yudiyana lebo Grekŋa kaw, nisi kaf ka gaa kuɗ sulukŋa.

¹⁰ Ki ɗo'ay nala: Sa ma ɗigera mayɗi, kep kaw mayɗi.

¹¹ Sa ma wi yalla mayɗi, sa ma gar Lawna mayɗi,

¹² Nisi kaf hin hagatawa goyo, nisi kaf muɗi goy waa'a, sa ma li va ma ŋaa'a mayɗi, kep kaw mayɗi.

¹³ Delsiya ki zulda ta pi sana nala, hiɗi vunsiya nisi ɗuta, sinaw guyna ka kuɗ vunsiya.

¹⁴ Vunsiya hobawa hiɗi ŋulda hiɗi galakka,

¹⁵ Sesi ka koloyo kay ɦok busuw goyo.

¹⁶ Ɓulakka hiɗi yorta ka hay hagata visiya,

¹⁷ nisi may wi hagata vi toyta noŋɗi.

¹⁸ Narta ta kuɗ Lawna may kirsi noŋɗi.

¹⁹ May nay wi ala slen pet ma vun-ma-gatna di'e, nam di kayni tisi sa ka gaa kuɗ vun-ma-gatna, kay vun san gige gigekaw ma ziŋa, a sumuna kaf kitata ma ko kisiya vok Lawna.

²⁰ Kay hiɗi lopna vi vun-ma-gatna sana fi muɗ ɗigere vok Lawn noŋɗi, hiɗi vun-ma-gatna san fi wi sulukŋa valamu.

MU'DA ƊIGERTA San muɗ goy ɗigere kuɗ vida hay Yesu Kristu

²¹ May wulini ɗigerta vi Lawna ta vun-ma-gatna hiɗi sa jobta di kalamna maawa goy haraŋi,

²² ɗigerta vi Lawna kuɗ vida hay Yesu Kristu maawa kay sa vi'e kaf, kay sa ma suw niram mayɗi.

²³ Kay kaf li sulukawa, nagay kay gajijita vi Lawnɗi may.

²⁴ Nisi fi ɗigertawa kuɗ slugota valamu ɦawa kuɗ butta-goyta hay Kristu Yesu,

²⁵ ma Lawna vulum goy ɗifini, kay nisi sa vi hay busuwna valamu, kay ɗek ɗigerta valam goyo. Kay suluk ma liy jewna nam hinim bay ka kitata kalamu.

²⁶ Nam mini kay ɗek ɗigerta valam goyo hay liyn ma wulinna, kay sumuna ma wum ɗigere, hay li ma nam muɗ sum sa vi hay Yesuna goy ɗigere.

²⁷ La nala nay subur tuway hiɗi mige? Kayn mayɗi. Kuɗ vun-ma-gatna marige? Kuɗ vun-ma-gatna vi lopna su? Mayɗi, may kuɗ vun-ma-gatna vi vida.

²⁸ Kay kiray ta ala sana fi ɗigerta kuɗ lopna vi vida bay vun-ma-gatna.

²⁹ Lebo Lawna, nam mi Lawna vi sa Yudiyan tuta su? Nam mi Lawna vi sa waana kawɗi su? Awa, nam mi Lawna vi sa waana kaw.

³⁰ Kay Lawna nam kep ma muɗ sa kaay gosayna ɗigere kuɗ vida visiya, nam muɗ sa bay ka-gosayna ɗigere kuɗ vida kaw.

³¹ La nala, nay muɗ vun-ma-gatnawa goy waa'a kuɗ dita su? May noŋɗi, may nay hobom kulo kayni mi vun-ma-gatna.