ROMENA 11 - BIBALDA TA PELDETTA

Lawna may noy sumuna valam goyɗi

¹ La nala, nan di ala Lawna noy sumuna valamawa goyo su? May noŋɗi. Kay nanu kaw mi sa ma Israyella kuɗ jafna vi Abraham, hay jaf Benyamin.

² Sumuna vi Lawna sa nam wisi jewna nam may cuksi goyɗi. Nigi bay wi va ma ɗota di kay Eliyas su? Nam col vok Lawna, law kay sa Israyella ala:

³ Bum-Sumuna, nisi ci sa jobta vaŋawa goyo, giwin-ma-ɗifinna vaŋu nisi ɦoomawa gaa'a, hini mi nan kepe, nisi gar a yaw irita van goyo kaw.

⁴ May Lawna hot diti talam anige? Nan ŋom sum sa jufayn goy birim siɗiya, sa bay girif ŋulofsi gaa vok Baal tuwa.

⁵ Nala kaw, kuɗ liyn ma wulinna, dir sumuna ma hinin ka'a, kayni kuɗ vilekka vi slugota.

⁶ Yo, la kayni kuɗ slugota, nam may lum kuɗ lopna loɗi. La naɗi slugota may ti slugota loɗi. La kayni kuɗ lopna, nam may kuɗ slugota loɗi. La naɗi lopna may mi lopna loɗi kaw.

⁷ Meloge! Va ma sa Israyella garamna, nisi may fumɗi, may sa vilekayna fumawa, segena nam so'otsi diksiya:

⁸ Ki ɗo'ay nala: Lawna vulsi ŋusta zulomda, vulsi ira may, kay nisi ma ɗuw hiɗi namɗi, vulsi humda, may kay hum hiɗi na'ɗi kaw, ta-ta hay fatta vaydita.

⁹ David di'e: Hin tina visiya muɗ goy jawta hiɗi dena voksiya, hinim muɗ mi va ma dabsi sesiya, wurakŋa visiya kaw.

¹⁰ Hin irsi muɗ jufunu kay nisi fi wiɗi, rotsi pelsi gaa dok-doko kaw.

Su'da vi sa waana hiɗi hamda cawta vi sa Israyella

¹¹ La nala nan min di ala: Sesi dab kayni kay puk gaa su? May noŋɗi -- May hiɗi ni-gaata visiya su'da coowa tam sa waana, kay kayni ma zliy hunayta kulo haysiya.

¹² May la ni-gaata visiya muɗ goy asta kay sa nagatna, la gi-goyta visiya muɗ goy asta kay sa waana, yawta-kulota visiya ma li suw kayni sem gaage?

¹³ May nan di tigi nigi sa waana, kay la nanu mi apostolla vi sa waana, nan subur lopna van namna,

¹⁴ kay la nan asa, nan fi kal hunayta jar sa hay jafna vanu, kay suɗ segen jarsiya.

¹⁵ Kay la kuɗ gi-goyta visiya sa nagatna toyawa hiɗi Lawna, a hot tapsi kulo kayni, irita ma may goy hay mitta paɗi su?

¹⁶ May la vun jaf ma niyi jewna ka peldete, ma bugolda kaf ka nala kaw, la sutayn kaf ka peldete, ɓam-guna ka nala kaw.

¹⁷ May la ɓam gu-olive mara'a ka haway goyo, la naŋu, gu-olive ma fulla, naŋ piy kulo'o hay baŋalamu, la naŋ tapay kepe tam sutayna hiɗi niy-gun olive,

¹⁸ naŋ ma subur tuwaŋ kat ɓam gunɗi. May la naŋ subur tuwaŋ talamu, waŋ goy ala ziy sutayn kayni may mi naŋɗi, may sutayn ka ziyaŋ naŋu.

¹⁹ Naŋ di ala: ɓam-guna kusi goyo kay nan pi hay baŋalamu.

²⁰ Awa, kay bay-vida visiya nisi kusi goyo. May naŋ ka piy zawn kuɗ vida vaŋu. La nala subur tuwaŋɗi, may laŋ nari:

²¹ Kay la Lawna hin ɓam-gu ma gasinɗi, nam as hinaŋ naŋɗi kaw.

²² Kay na'ta ɗuwaŋ ŋaata hiɗi dikga-kuta vi Lawna: Dikga-kuta kay nisi sa ni gaa'a, may kaŋu ŋaata vi Lawna ka'a, la naŋ mus hay ŋaata valamu ta-ta. May la naɗi, naŋ kaw ma kaaŋis goyo.

²³ May nisi kaw ma hot piys kulo hayamu, la nisi lak hay bay-vida visi loɗi. Kay donota vi Lawna ka'a kay hot pisi hay lo.

²⁴ Kay la nam hawaŋ naŋay goyo hay hay gu-olive ma ful pa paŋ hay gu-olive ma ŋaana, nisi sa ɓam-gu ma gasina nam as hot pisi hay ɓam-guna visi ma jewna bay lopo.

²⁵ Kay ɓosiyonna, nan min ala nigi ma lak hay bay-wida kuɗ ŋayayta kayniɗi, a nigi ma sar tuwgi ki nigi yal ŋolo naɗi. Kay galla vi sa Israyella so'ot diksiya ta-ta sum sa waana kaf cuk kalafi.

²⁶ Nala sa Israyella kaf ma fi su'da. Ki ɗo'ay nala: Goy hay Siyon pa sa ma su'da ma ma'a, nam ma digiɗ jiw-zlata goy vi Yakub pa.

²⁷ Kayni bonota vanu hiɗi nisiya, hay li ma nan ma yaw sulukŋa visi goyo.

²⁸ Kuɗ labara ma firina, nisiya si sa gawta kuɗgi nigiya, may kuɗ vilek-goyta, nisiya sa hayam kisina kay semda vi sumaysiya.

²⁹ Kay vulda-slugota vi Lawna hiɗi yita valamu nam as muɗumɗi.

³⁰ Kay ki nigi jewe ŋel vun Lawna, may wulini nigi fi slugotawa kuɗ ŋel-vunda visiya,

³¹ nala kaw nisi wulini ŋel vunawa, kay nisi kaw ma fi slugota hiɗi slugota ta nigi fa'ta.

³² Kay Lawna vul sumun kaf goy hay ŋel-vunda, kay nam min li slugota mi kafe.

³³ Hih! Ŋolda vi asta vi Lawna, ŋolda vi wida valamu hiɗi yalda valamu zul ŋolo natige! Kitana valamu sa as fekemɗi, hagata valamu bay balami kaw.

³⁴ Sa ma wi varta vi Bum-Sumuna mi gige? Lebo sa ma ɗiger lawta hiɗi namu mi gige?

³⁵ Lebo sa ma vulum va jewe a nam ma hot wurakamta mi gige?

³⁶ Kay goy hay nam pa, hiɗi namu, talam namu kaw slen pet ka'a. Talam namu gajijita hay vatɗita vatɗita. Amen.