NULLA 99 - BIBALDA TA PELDETTA

¹ Ma-Vatɗina ti mulda, sumuna tuwsi visi bat-bat'. Nam mus kulo'o kay kerubena, nagata geɗa.

² Ma-Vatɗina mi ma ŋolla hay Siyon, nam mi ma ŋolla kulo'o kay sumun kafe.

³ Hinsi subur semda vaŋu ta ŋolda ta narta kuɗa'ta, nam peldete.

⁴ Hinsi tiy sem donota vi mulla ma min ɗigerta, naŋ vul donota mi lawta ta gasita. Naŋ li lawta ta hay liya'ta hiɗi kitata ɗigerta hay jafna vi Yakub.

⁵ Sligi yam Ma-Vatɗina Lawna vay kulo'o, girifgi gaa vok ɗigalla ma nam tun selem kalamna, nam peldete.

⁶ Musus hiɗi Aaron ay jar muliyan-sa-ɗifinna valamu, Samuel kaw ay jar nisi sa yi semda valamu, nisi siwel tam Ma-Vatɗina, nam hum siɗawta visiya.

⁷ Nam law tisiya hay ɗugul ma no'osna; nisi li kuɗ vun-ma-gatna valamu, hiɗi gatta ta nam vul tisiya.

⁸ Ma-Vatɗina Lawna vuma'a, naŋ hum siɗawta visiya, naŋu mi Lawna ma cuksi sulukŋa visiya, may naŋ ka kitat kisiya kuɗ joota visiya.

⁹ Sligi yam Ma-Vatɗina Lawna vay kulo'o, girifgi gaa'a vok hiɗiyta valamu ta peldetta, kay Ma-Vatɗina Lawna vaya nam peldete.