NULLA 96 - BIBALDA TA PELDETTA

¹ Gigi nul tam Ma-Vatɗina, nul ma wuliya. Gigi nul tam Ma-Vatɗina, nigi kaf, sum sa hay nagata.

² Gigi nul tam Ma-Vatɗina, suburgi semda valamu. Digi goy kay su'da valamu hay buurta kafe.

³ Digi goy kay gajijita valamu jar jaf-sumuna, digi goy kay ŋaata valamu tam sumun kaf.

⁴ Kay Ma-Vatɗina namu mi ma ŋolla, nam nagaya kay fi suburta kaw. Narta kuɗumta ŋolo suw lawayn kafe.

⁵ Kay lawayna vi sum segen kaf mi lawayn ma waa'a ɦawa, may Ma-Vatɗina mi ma li wuralawna.

⁶ Ŋolda hiɗi gajijita ka vok iramu, donota hiɗi jifiyta ka hay liyn ma peldetna valamu.

⁷ Nigi jaf-sumuna, vulgi mi Ma-Vatɗina, vulgi mi Ma-Vatɗina gajijita hiɗi suburta.

⁸ Vulgi mi Ma-Vatɗina gajijita tam semda valamu, Margi vulda, cukgi kalaf hay wur-daŋŋa valamu.

⁹ Girifgi gaa vok Ma-Vatɗina hiɗi ganna vigi ma peldetna. Hin tuwgi vigi bat-bat' vokomu, nigi sum sa hay nagatna.

¹⁰ Digi goy jar jaf-sumun ala: Ma-Vatɗin ka ti mulu; lo nagat coli dono'o, na' may geɗ noŋɗi. Ma-Vatɗina ka kitat kay jaf-sumun hiɗi gasita.

¹¹ Hin dukalawna li firiya, hin nagata siwel hiɗi firita, hin niy-lum ŋolla zama hiɗi sle ma hayam petna kaw.

¹² Hin sinena li firiya hiɗi sle ma hayam petna, hay na'ta guna ma hay juruta pet ma gi nul ma firita.

¹³ Vok ir Ma-Vatɗina. Kay nam ka ma'a, kay nam ka ma'a kay ka kitata kay nagata. Nam ma ka kitat kay nagata hiɗi ɗigerta, ma ka kitat kay sumuna kuɗ gasita valamu.