NULLA 94 - BIBALDA TA PELDETTA

¹ Ma-Vatɗina, naŋ Lawna ma wurak joota, naŋ Lawna ma wurak joota, ɗek tuwaŋ goy hay gajijita.

² Fokaŋ kulo'o, naŋu ma ka kitata vi nagata, vul mi sa jigal tuwsina wurakŋa visiya.

³ Ma-Vatɗina, sa jiw-zlata ma li ta-ta lancitige? Sa jiw-zlata ma kola ta-ta lancitige?

⁴ Nisi ɓak ŋolo, nisi law joo'o, nisi kaf sa li joota subur tuwsiya.

⁵ Ma-Vatɗina, nisi tay sumuna vaŋ gaa'a, nisi curoɗ vocota vaŋu;

⁶ Boy sa duhulla hiɗi sum sa pulla nisi ŋatsi goyo, sa kuyuna nisi cisi goy mati.

⁷ Nisi di'e: Ma-Vatɗin may wiɗi. Lawna vi Yakub may jak humamɗi.

⁸ Ligi ŋali, nigi sum sa bay-yalla, nigi sa ɦay-ɦayna, nigi muɗ yal ɗawn lancitige?

⁹ Nam ma kot humda, nam humɗi su? Nam ma li ira, nam wiɗi su?

¹⁰ Namu ma gat jaf-sumuna, nam as cuksi daŋgayɗi su? Namu mi ma vul yalda mi sanɗi su?

¹¹ Ma-Vatɗina wi varta vi sumuna, nam wi ala na' waa'a ɦawa.

¹² Sle'ta ka kay sa ma naŋ gatamna, Ma-Vatɗina. Sa ma naŋ hatam hay vun-ma-gatna vaŋu kaw.

¹³ Kay vulum tun-sukka hay buura vi joota, ta-ta zulla jugoɗa kay sa jiw-zlata.

¹⁴ Kay Ma-Vatɗina min cuk sumuna valam goyɗi, nam may noy vocota valam goyɗi;

¹⁵ kay kitata ma ŋra dig ɗigerta, nisi kaf sa diksi ɗigere ma vi kayni kaw.

¹⁶ Sa ma min fok kulo hiɗi nanu kat sa joona mi gige? Ma min gut kuɗanu kay sa lan joota mi gige?

¹⁷ La Ma-Vatɗina may gut kuɗanɗi, ciwta vanu ma kal gosoyo hay ziyna vi musta kiliŋga.

¹⁸ Hay li ma nan di ala sen sli zlaraŋgadaya, hay na'ta ŋaata vaŋu colan kulo ta'a.

¹⁹ Hay li ma varta giriŋga li ŋolo hay dikanu, teŋ-irta vaŋu firiyan dikanu.

²⁰ Sa ka kitata ta gunita vunsi as ŋra hiɗi naŋ su? Nisi sa col lawta bay-ɗigerta hay baŋal gatta?

²¹ Nisi tok tuwsi ŋolo kay ciwta vi sa ma ɗigera, nisi ka kitat kay busuw ma bay-joota.

²² May Ma-Vatɗina mi liyn ma ŋayna vanu, Lawna vanu mi hiɗiyn ma nan ŋay talamna.

²³ Nam ma hin joota visiya hot nig gaa kisiya, nam ma vatsi goyo kuɗ joota visiya; Ma-Vatɗina Lawna vaya ma zansi vunsiya.