NULLA 90 - BIBALDA TA PELDETTA

ƊERWEL MA FIƊINA

1 Siɗawta vi Musus, sana vi Lawna.

¹ Siɗawta vi Musus, sana vi Lawna. Bum-Sumuna, naŋu mi liyn ma musta vuma'a hay jafn pa ta-ta tam jafn lo.

² Jew inda vi hiɗiyna, jew a naŋ in nagata hiɗi sle ma kay nagatna. Hay vatɗita vatɗita pa naŋu mi Lawna.

³ Naŋ hot san gaa hay nagata, naŋ di 'e: Gurona vi Adam, hotgiya!

⁴ Kay busat kis vok iraŋu, ki buurta kamata nala hay li ma na' capa, ki henjeta ta kepta ɦawa nala.

⁵ Naŋ kal hiɗi nisiya, nisi ki liyn ma kal sen neeɗa ɦawa nala, awa, graw culumta cap ki usna nala:

⁶ Nam ɓo hay graw culumta nam capa, san kaam kulo'o hay vulatita, nam cap so goyo.

⁷ Numa ka tuwura kay ɦiyda vaŋu, purcakka vaŋu muɗma nari.

⁸ Naŋ tun jiw-zlata vuma'awa vok iraŋu, sulukŋa vuma ma ŋayayna ka tuni vok haraŋa vi vokaŋu kaw.

⁹ Buura vuma kaf ka vat goyo kuɗ ɦiyda vaŋu; buura vuma kaf ka kala ki suk ma gi kepna nala.

¹⁰ Buura vi irita vuma'a kayni busata dok-siɗiya, sa donona busata visi co dok-glafandi may; suburta valam kayni mi lopna hiɗi yorta ɦawa, kay nam raw gosoyo, numa pir goyo may.

¹¹ Sa ma wi donota vi ɦiyda vaŋu hiɗi hiyda ŋolda vaŋu, ta-ta san li nar kuɗaŋu hay liyamu mi gige?

¹² Hatma'a kay numa ŋa buura vuma ŋaa'a, kay numa'a ma fi yalla hay dikga.

¹³ Hotaŋiya, Ma-Vatɗina, ta-ta lancitige? Hin sa sunda vaŋu muɗ kiraŋ hawi.

¹⁴ Hinma hoba grawta hiɗi ŋaata vaŋu, kay numa fi gi nulla, li firiya kaw hay buura vuma kafe.

¹⁵ Hinma li firi ir buur ŋolo, ŋray ca hiɗi buur ma naŋ lasmana, busata ŋolo ki numa'a wi jootawa nala kaw.

¹⁶ Hin lopna vaŋu ma goy haraŋi kir sa sunda vaŋu, hin gajijita vaŋu kay gurona visiya kaw.

¹⁷ Hin ŋaata vi Ma-Vatɗina Lawna vuma'a li kuma'a, gutaŋ kuɗ lopna vi ɓuma'a, Awa gutaŋ kuɗ lopna vi ɓuma'a gutge.