NULLA 9 - BIBALDA TA PELDETTA

¹ Tam ma ŋolla vi sa gi nulla. Kay alamotna vi gurona. Nulla vi David.

² Nan min subur Ma-Vatɗina hiɗi dikan kaf, nan min di goy kay lopna vaŋ ma ŋulona kafe.

³ Nan min li firiya, dikan ma li ŋaa'a kaw kaŋ naŋu, nan min gi nul ma gi-deɓta tam semda vaŋu, naŋ ŋol ma Kulo-Jamna.

⁴ Sa gaw kanna ka hot bugolo, nisi ka tupa tiŋ-tiŋ', ka mit goyo vok iraŋu kaw.

⁵ Kay naŋ gutawa kuɗanu kay ka kitata van hay hagata va'a, naŋ musawa kay zlamda-mulda kay ka kitat ɗigere.

⁶ Naŋ ka kitat kay jaf-sumuna, naŋ vat sa jiw-zlat goyo, naŋ ɦas semda visi goyo ta-ta hay vatɗita vatɗita.

⁷ Sa gawta vatay goyo kay dok-doko, ziyna visi may loɗi, hoyok-ziyna visiya naŋ ɦoomawa gaa'a, hum sa as gum kisi loɗi.

⁸ Ma-Vatɗina musi mulu ta-ta hay vatɗita, nam tun zlamda-mulda vi kitata valamawa.

⁹ Nam ka kitat kay sumuna hiɗi ɗigerta, nam ka kitat kay sumuna hiɗi gasita.

¹⁰ Ma-Vatɗina mi liyn ma ŋayna vi sa sumun curoɗsina, liyn ma ŋayna hay li ma zlat coowa.

¹¹ Nisi sa wi semda vaŋu min ŋay taŋu, kay nisi sa garaŋu, Naŋ Ma-Vatɗin may hinsi goy waaɗi.

¹² Gigi nul ma suburta tam Ma-Vatɗina, nam ma ka musi hay Siyonna. Digi goy jar sumuna kay lopna valam ma ŋulona.

¹³ Kay nam job yam busuwna, humam gum kay sa hawna, yalam may jok tiyta visiɗi.

¹⁴ Ma-Vatɗina, lan slugota lige. Ɗuwaŋ las ma sa gaw kanna ka lasanu tige, naŋ ma slan goy hay vun-galana vi mitta ɗawge,

¹⁵ Kay nan fi suburaŋ hay vun-galana vi guro-boyna vi Siyon kafe, nan min firiya hay su'da vaŋu.

¹⁶ Jaf-sumuna ka cuk gaa'a hay zulda ta nisi jugoɗa'ta, Jawta ta nisi gana' goy ŋayayta sesi vi haya'a.

¹⁷ Ma-Vatɗina ɗek tuwamawa goyo, nam ka kitatawa, sa ma jiw-zlata lopna valamu nigawa kalamu. Liw dilla Gi-suk.

¹⁸ Sa jiw-zlata ma tuɗ gaa hay liyna vi sa mitina, nisi jaf-sumuna kaf sa yisi jok Lawna.

¹⁹ Yalam may jok sa hawna goy dok-dokɗi, cubta-sle'ta vi sa ziy-zlata ma vat goyo kay dok-dokɗi.

²⁰ Ma-Vatɗina, fokaŋ kulo'o, hin sumun kolɗi, hin kitata nig gaa kay jaf-sumuna vok iraŋu.

²¹ Ma-Vatɗina, hinaŋ narta nig gaa kisiya, hin jaf-sumuna wi tuwsi ala nisi si sum-wura ɦawa. Gi-suk.