NULLA 88 - BIBALDA TA PELDETTA

¹ Nulla vi gurona vi Kore. Tam ma ŋolla vi sa gi nulla. Kay gi nul namna hiɗi zlekemna. Nulla vi Heman ma Ezrahitna.

² Ma-Vatɗina, Lawna ma su'da vanu, hay falayta hiɗi henjeta kaf nan ka siwel vok iraŋu.

³ Hin siɗawta vanu co vok iraŋu, jakaŋ humaŋ tam giɗel-delta vanu.

⁴ Kay ciwta vanu hobawa hiɗi lasta, irita vanu ka co tam liyn ma musta vi sa mitina.

⁵ Nan ŋaɓay jar nisi sa jik gaa hay zulla, nan muɗi ki sa ma donota valam may loɗina nala.

⁶ Nan ka meɗay goyo jar sa mitina, ŋray ca ki sum sa ciy mati, jiki gaa hay zulda nala, ŋray hiɗi sum sa humaŋ gaŋ kisi loɗi, sa jarsi jay goy hiɗi naŋu.

⁷ Naŋ ganawa gaa hay zul ma guɗumna, hay jufunda, hay zul ma wiŋŋa.

⁸ ɦiyda vaŋu burawa kan neke, naŋ lasanawa hiɗi billa vaŋ kafe. Gi-suk.

⁹ Naŋ digiɗ boniyonnawa goy gine'e hiɗi nanu, muɗanawa liwisi kirsiya, vunan duki kalafi, nan as kal goyɗi.

¹⁰ Iran ka kormota kay curo'da, Ma-Vatɗina, nan ka yaŋ seŋ hay buurta kafe, nan ka meɗ ɓan kulo'o taŋu.

¹¹ Naŋ min ɗek sle ma ŋulo ŋulona tam sa mitina su? Sa mitina fi yaw kulo'o kay suburaŋu su? Gi-suk.

¹² Sa fi di goy kay ŋaata vaŋu gaa hay zulda su? Sa fi di goy kay gasita vaŋu hay zul ma wiŋŋa su?

¹³ Lopna vaŋ ma ŋulo ŋulona sa fi wum hay jufunda su? Ɗigerta vaŋu kaw san as kay wa' hay nagata ta yam san jokay ka'ta su?

¹⁴ May taŋ naŋu, Ma-Vatɗina, nan ka siwela, hay grawta siɗawta vanu ma co taŋu.

¹⁵ Ma-Vatɗina, naŋ zut ciwta van goyo kay mige? Naŋ min ŋay iraŋ kanu kay mige?

¹⁶ Nan makawa, goboy hiɗi mitta kaw hay joriyota vani pa. Narta vaŋ ta ŋolda vanawa, nan wi va ma li loɗi.

¹⁷ ɦiyda vaŋu jikawa kulo kanu, narta ŋolda ta kuɗaŋga banawa goyo;

¹⁸ Narta ka ŋuyanu hay buurta kaf ki niyna nala, na' tap vun-tuwa'awa, ŋuyanawa.

¹⁹ Boniyonna hiɗi sa poy hiɗi nanu naŋ digiɗsiyawa goy gine hiɗi nanu, sa nan wisina muɗi jufunu.