NULLA 85 - BIBALDA TA PELDETTA

¹ Tam ma ŋolla vi sa gi nulla. Nulla vi gurona vi Kore.

² Ma-Vatɗina, naŋ li ŋaatawa tam nagata vaŋu, sa daŋgayna vi Yakub naŋ yawsi ayawa goyo.

³ Naŋ yaw jiw-zlata vi sumuna vaŋawa goyo, naŋ vul gidawa kay sulukŋa visi kafe. Gi-suk.

⁴ Naŋ yaw roŋŋa vi dikaŋawa goy kafe, naŋ hin kuta vi ɦiyda vaŋu hot bugolo.

⁵ Lawna ma su'da vuma'a, hotma'aya, hin ɦiyda vaŋ ta tumata vat goyo.

⁶ Naŋ min li ɦiy tuma'a ta-ta hay vatɗita su? Naŋ min ala ɦiyda vaŋ ma li tam jafna vokom lo lo su?

⁷ Naŋ min muɗma iri loɗi su? Kay sumuna vaŋu fi li firiya hayaŋu?

⁸ Ma-Vatɗina, hinma wi ŋaata vaŋu, vulma su'da vaŋu.

⁹ Nan min hum va ma Ma-Vatɗin Lawn min di'e, kay nam min law kay sle'ta tam sumuna valamu, tam sa peldetna valamu, may la litigekaw nisi hot tam ɦay-ɦayta loɗi.

¹⁰ Gasi, su'da valamu ka goboy hiɗi sa li nar kuɗumu, kay gajijita ma mus hay nagata vaya.

¹¹ slugota hiɗi gasita ma ŋaf tam tuwsiya, ɗigerta hiɗi sle'ta ma co vun tuwsiya.

¹² Gasita ma dayay kulo'o hay nagata pa, ɗigerta ma ɗuw gaa wuralawn pa.

¹³ Awa, Ma-Vatɗina min vul va ma ŋaana, nagata vaya ma vul jaf-slena va'a kaw.

¹⁴ Ɗigerta ma tun vokomu, se' ma ɓir hagan gaa'a.