NULLA 83 - BIBALDA TA PELDETTA

¹ Nulla vi Asaf.

² Lawna, naŋ ma ziŋɗi, ba vunaŋɗi, tun sukaŋɗi, naŋ Lawna.

³ Kay ɗuwaŋu, sa gawt kaŋŋa li gijum-gijum', nisi sa ka gawt taŋu sli yisi kulo'o.

⁴ Nisi ŋra vunsi hiɗi law ma ɗutna kat sumuna vaŋu, nisi ŋra vunsi kay sum sa naŋ ka ŋomsina.

⁵ Nisi di'e: Nigiyaya, nay ma vatsi goyo jar jaf-sumuna, kay hum sa ma gum kay sem sa Israyella loɗi.

⁶ Nisi ŋra vun tuwsiya, diksi tapay kepe, nisi jun bonot jar-tuwsiya kaŋ naŋu.

⁷ Guɗukŋa vi Edom hiɗi sa Ismayella, sa Mowabna hiɗi sa Hagariyena.

⁸ Gebal hiɗi Amon hiɗi Amalek, sa Filistina hiɗi sa Tirusna kaw.

⁹ Asiriya kaw tapay hiɗi nisiya, nisi gut kuɗ gurona vi Lot. Gi-suk.

¹⁰ Naŋ ma li tisiya ki naŋ li tam Madiyan nala, tam Sisera, tam Yabin hay lokŋa vi Kison nala.

¹¹ Nisi ba goyo gal En-Dor, Nisi muɗi ki goy zigidiki kay nagata.

¹² Naŋ ma li tam sa ŋulona visiya ki tam Oreb hiɗi Zeb nala, naŋ ma li tam sa ŋulona visiya ki tam Zebak hiɗi Salmuna nala.

¹³ Kay nisi di'e: Nay ma yaw ziyna vi Lawna muɗum goy ir vaya.

¹⁴ Lawna vanu, naŋ ma muɗsi ki hiwliŋŋa nala, ki burana vok simeɗna nala.

¹⁵ Ki kuta ta ŋal juruta nala, ki sin-kuta ta ŋal hiɗiyna nala.

¹⁶ Digiɗsi goy nala hiɗi birina vaŋ ma ŋolla, hinsi tuwsi visi bat-bat' hiɗi birina vaŋu.

¹⁷ Hobsi irsi kulo hiɗi zulota, ta-ta nisi muɗ gar semda vaŋu, naŋ Ma-Vatɗina.

¹⁸ Hinsi muɗ zulo'o, li nari kaw kay dok-doko, hinsi muɗ zulo'o, ba goy kaw.

¹⁹ Hinsi wi ala naŋ kep semda vaŋ ala Ma-Vatɗina, ma ŋol ma kulo kay nagat petna.