NULLA 73 - BIBALDA TA PELDETTA

ƊERWEL MA ꞪIDINA

1 Nulla vi Asaf.

¹ Nulla vi Asaf. Gasi, Lawna nam ŋaa'a tam Israyel, tam nisi sa diksi peldete.

² May nanu, senu goboy zlirgat goyo, hini ne' ɦawa a senu cal goyo.

³ Kay nan li hunay tam sa ɦay-ɦayna, hay li ma nan wi sa jiw-zlatna muɗ faraya.

⁴ Va ma lisi joo'o mayɗi ta-ta tam mitta visiya, tuwsi ɗori goy ŋolo;

⁵ nisi may wi zumalda ki sum segen naɗi, lasta may lisi ki sum segen naɗi kaw.

⁶ Kay na'ta suburta vi tuwsiya muɗi ki kermena ma giy kelsiya nala, ɦawlata cuki tisiya ki sligara nala.

⁷ Irsi ŋirsli goyo hiɗi ɗoora, varta vi diksi suluri goyo.

⁸ Nisi ŋula, law joo'o kay curoɗ sumuna; nisi di yoboyn ma jigal tuwsiya.

⁹ Nisi sli vunsi kulo'o ta-ta tam dukalawna, sinsi raw vokomu vokomu tam nagata.

¹⁰ Kuɗ na'ta sumun kaf muɗ irsi kuɗsiya, nisi ci yoboyna visiya ki san ci niyna nala.

¹¹ Nisi di'e: Lawn wi ɗawn witige? Ma Kulo-Jamna wi ɗawn witige?

¹² Sa jiw-zlata nisi ki kayni nala, haysi sleɗay dok-dok, farayna visi biya'a.

¹³ Nan li dikan goy peldete, Nan muz ɓan goyo hay bay-joota kaw, kayni waa'a ɦawa.

¹⁴ Kay nan busa he' kayn hay lasta, Graw culumta kaf lasta van ka'a.

¹⁵ La nan di ala nan min law kisi nisi nala, nan di newt kayn kay jafna vi gurona.

¹⁶ Hay li ma nan vara kay wi kayni, kayni muɗ kiran lop ŋolo.

¹⁷ Ta-ta hay li ma nan kal kalafi hay liyn ma peldetna vi Lawna, hay na'ta nan wi dabaŋ-gu'ta vi sa joona.

¹⁸ Gasiya, naŋ laksi hay liy ma golɓoto, naŋ hinsi puk gaa'a, ɓulaksi goyo kaw.

¹⁹ Mi mige! Nisi ba goyo ir liyn neeɗa ɦawa, nisi yaway goyo, vatis goy wah'.

²⁰ Ki san vara' waa'a kay duwayta hay li ma nam zliy kulo'o, nala naŋ Bum-Sumun ɗuw ŋussi waa'a, hay li ma naŋ zliy kulo'o.

²¹ Hay li ma dikan fok kulo'o, gilesan kaw ka tanu ki jiki tip' nala.

²² Hay na'ta nan ay bay-yali, wi vaɗi kaw, nan ay vok iraŋu ki muuriyan nala.

²³ Nir na'ta kep nan ka hiɗi naŋu dok-doko, naŋ van ɓan ma jufnawa;

²⁴ naŋ min ɗekan kay hagata hiɗi gatta vaŋu, bugol kayni naŋ min van kulo'o hay gajijita.

²⁵ Nan fum hay wuralawna mi gige? Mi naŋ kep ɗisu? Gaa kay nagata nan tun darta van kayn kaŋ naŋ kepe.

²⁶ La sliwanu hiɗi dikanu vatis goyo, Lawna nam mi donota vi dikanu, mi galla vanu kaw ta-ta hay vatɗita.

²⁷ Kay ɗuwaŋu, nisi sa ka gine'e hiɗi naŋu ma ba goyo, naŋ vat goy nisi kaf sa hinaŋu, nisi sa li tuwsi viyuwu.

²⁸ May kayni ŋaa'a kanu kay mus goboy tam Lawna. Nan zam ɓam Bum-Sumuna Ma-Vatɗina, kay nan fi di goy kay lopna valamu kafe.