NULLA 71 - BIBALDA TA PELDETTA

¹ Ma-Vatɗina, nan gar liyna van ma ŋayna taŋ naŋu, hinan muɗ zuloɗi ta-ta hay vatɗita.

² Butan goyo, suɗan goyo kuɗ ɗigerta vaŋu; muɗaŋ humaŋay tanu, suɗan kaw.

³ Naŋ ma li mi hiɗiy ma nan ŋay talamna, kay nan ma tuɗ talamu dok-doko. Naŋ di goyawa kay suɗanu, kay naŋu mi hiɗiyna vanu, mi gulmun ma duura vanu kaw.

⁴ Lawna vanu, suɗan goy hay ɓam sa jiw-zlata, goy hay ɓam sa bay-ɗigera hiɗi sa ɦawlana.

⁵ Kay naŋu mi cubta-sle'ta vanu, Bum-Sumuna Ma-Vatɗina! Nan ka zamaŋ ɓaŋ ay hay joriyota van pa.

⁶ Kalaf hay suni pa nan deŋ tuwan taŋu; naŋu mi ma kalanay goy hay suni pa. Nan min gi nul ma suburta dok-dok taŋu;

⁷ nanu muɗi mi va ma ɦuyumda kuɗumu, may naŋu mi liyn ma ŋayna van ma donona.

⁸ Hin vunan hob hiɗi suburta taŋu, hinan suburaŋu hay buurta kafe.

⁹ Gan goyɗi hay li ma nan muɗ maari, hinan goyɗi hay li ma donota van vat goyo.

¹⁰ Kay sa gawt kanna ka law kanu, nisi sa cigeɗ irita vanu ŋra vunsi jar-tuwsiya.

¹¹ Nisi di'e: Lawna hinimawa goyo, jaŋay kuɗumu, vumu, kay sa ma suɗum goy mayɗi.

¹² Lawna, col goy gine'e hiɗi nanɗi, Lawna vanu, naŋay gosoyo kay gut kuɗanu.

¹³ Hin nisi sa gaw tanu muɗ zulo'o, ba goyo kaw. Hin nisi sa gar a ɓulakanu cuki hiɗi zulota hiɗi hawta.

¹⁴ May nan min cub hiɗi sle'ta dok-dok. Nan min gaŋ deɓ suwa lo suwa lo.

¹⁵ Vunanu ma di goy kay ɗigerta vaŋu, nan ma di goy kay su'da vaŋu buurta kaf, kay nan may wi ŋaɓta valamɗi.

¹⁶ Nan min di goy kay lop ma donona, Bum-Sumuna Ma-Vatɗina! Nan min di goy kay ɗigerta vaŋu, vaŋ naŋ kepe.

¹⁷ Lawna, naŋ hatanawa hay joriyota van pa, ta-ta wulini nan di goy kay lopna vaŋ ma ŋulona.

¹⁸ Wulini kaw, hay maarta vanu hiɗi ɗuŋus ma haɓna, Lawna may hinan goyɗi, ta-ta nan fi di goy kay donota vaŋu tam jaf ma wulinna, gaŋeraŋa vaŋu tam jaf ma min ma'a kaw.

¹⁹ Lawna, ɗigerta vaŋ kulo gine'e, naŋ li sle ma ŋulona, Lawna, ma ŋray hiɗi naŋu mi gige?

²⁰ Naŋ hinmaawa ɗuw lasta hiɗi joot ŋolo, naŋ min muɗma iriya lo, yawma kulo'o lo goy hay zul ma wiŋŋa vi nagata pa.

²¹ ɦur ŋolda van kulo'o, teŋan iran mara lo.

²² Nan min suburaŋu hiɗi dilla, gi nul kay gasita vaŋu, Lawna vanu, nan min gi nul taŋu hiɗi dil ma ŋolla, naŋu ma peldetna vi Israyel.

²³ Vunanu min siwel hiɗi firita, kay nan min gi nul ma gi-deɓta taŋu, ciwta van ta naŋ buta' goyta kaw.

²⁴ Vunan min kus yoboy kay ɗigerta vaŋu buurta kaf, kay nisi sa gar a ɓulakanu muɗi zulo'o, nisi fi va ma liɗi.