NULLA 7 - BIBALDA TA PELDETTA

¹ Nul ma tiy-tuwna vi David, ma nam gum tam Ma-Vatɗina, kuɗ lawta vi Kus ma Benyaminna.

² Ma-Vatɗina Lawna vanu, nan ŋay taŋ naŋu; naŋ suɗan goy suɗge kay nisi kaf sa ka lan lasi.

³ Kay nisi ma jetan goyo ki zlon jet va goyo bay gutda naɗi.

⁴ Ma-Vatɗina Lawna vanu, la nan li slen kaynawa, la bay-ɗigerta ka hayanu,

⁵ la nan hot jootawa tam nisi sa lakay hay sle'ta hiɗi nanu, la nan vurum slena vi sa ma ka gawt kan bay lawtnawa,

⁶ hin sa ma gawt kanna jaŋ kuɗanu, vanu kaw, awa, hinsi tay irita van gaa kay nagata, hinsi bur gajijita vanu gaa kay buɗufna kaw.

⁷ Naŋ Ma-Vatɗina, fokaŋ kulo'o hay ɦiyda vaŋu, fokaŋ kulo'o kat waskayta vi sa gaw kanna, zliyaŋ kulo'o kay gut kuɗanu, vulaŋ hagata kay kitata ma ka'a.

⁸ Hin tokŋa vi jaf-sumuna ŋuyaŋu, jikaŋ kulo kisiya hay liyn ma kulona.

⁹ Ma-Vatɗina, kaaŋ kitat kay sumuna, kaaŋ kitata van hay hagata va'a kuɗ bay-joota vanu, kaaŋ kitat kanu kuɗ ɗigerta vanu hiɗi bay-joota vanu.

¹⁰ Hin mileta vi sa joona vat goyo, may vulaŋ donot mi sa ɗigera, naŋu ma fek dikga hiɗi glesna, naŋ Lawn ma ɗigera.

¹¹ Kuroŋŋa vanu ka hay Lawna ma suɗ sum sa ɗutta may hay diksiɗi.

¹² Lawna mi ma ka kitat ɗigere, awa, Lawna mi ma muɗ ɦiy hay buurta kaf.

¹³ La sa ma sulukŋa min hamɗi, nam ma ligaɗ siy kew-gaferaŋa valamu, nam ma tun ɓarawta valamu hay taŋa'a, nam ma ɓe'e may.

¹⁴ Nam kot sle-ma-duura vi mittawa, ɓarawna valamu ka do kuwa.

¹⁵ Humgiya, sa ma jiw-zlata kot joota, nam sli haya hiɗi sulukŋa, nam vuɗ sinda may.

¹⁶ Nam jugoɗ zulda, kota' kaw. May nam nig gaa hay zul ta nam jugoɗa'ta.

¹⁷ Sulukŋa valamu hot nig gaa kalamu, waskayta valamu nig gaa kay zok-taɓaramu.

¹⁸ Nan min subur Ma-Vatɗina kuɗ ɗigerta valamu, nan min gi nul tam semda vi Ma-Vatɗina, ma ŋol ma kulona.