NULLA 69 - BIBALDA TA PELDETTA

¹ Tam ma ŋolla vi sa gi nulla. Nulla vi David.

² Suɗan suɗge, Lawna, kay niyna min li irita van joo'o.

³ Nan siri gaa hay turoɓ ma zul ŋolo, liy ma tun sen kalam mayɗi, nan coy hay niyn ma zul ŋolo, niyn ma jaŋŋa ɗubanu.

⁴ Nan siwelawa ta-ta tuwan makaya, delan sa'ataya, iran muɗ maŋaya hay li ma nan cub Lawna vanu.

⁵ Nisi sa ka gawt kanu nisi ka ŋolo suw ɗuŋus yanu. Nisi sa min ɓulakan goyo, sa ka gawt kanu bay lawta, nisi dono'o. Sle ma nan bay yawa, la litigekaw nan ma hotsit goyo.

⁶ Lawna, naŋ wi ɦay-ɦayta vanu, sulukŋa vanu ŋayay kiraŋɗi kaw.

⁷ Hin nisi sa cubaŋ naŋu muɗ goy zulo'o kuɗanɗige, Bum-Sumuna, Ma-Vatɗina vi vok-ma-duura. Hin nisi sa cubaŋu muɗ goy zulo kuɗanɗi, naŋ Lawna vi Israyel.

⁸ Kay kuɗaŋ naŋu nan ka ziy ŋulda, zulota baran iranawa.

⁹ Nan muɗi ki sa ma rogoyna nala tam ɓosiyonna, ki sa ma pulla nala tam gurona vi sunu kaw.

¹⁰ Kay ciwerta kay ziyna vaŋu tiyof tuwanawa goyo, ŋulda vi nisi sa ŋulaŋu nig gaa'a kanu kaw.

¹¹ Hay li ma nan tiya, nan li laata kaw, kayni muɗi ti ŋulda kanu.

¹² Hay li ma nan cuk sligar ma yorta tanu, semda vanu muɗi goy cenda hay vunsiya.

¹³ Nisi sa lak goy hay vun-galana kus yoboy hiɗi senu, nan tuni goy nulu kay sa ci dolayna.

¹⁴ May nanu, nan maawa hiɗi siɗawta van taŋu, Ma-Vatɗina, hin slugota vaŋ li tuwa, Lawna, kay ŋaata vaŋ ta ŋolda, hum siɗawta vanu hay gasita vi su'da vaŋu.

¹⁵ Suɗan goy hay turoɓna, hinan sir gaaɗi, suɗan goyo kay nisi sa ka gawt kanu, kay niyn ma zulla kaw.

¹⁶ Hin niy ma jaŋŋa ɗubanɗi, hin zulla ɗuban goyɗi, hin kaata duk vuna' kulo kanɗi kaw.

¹⁷ Ma-Vatɗina, hum siɗawta vanu, kay ŋaata vaŋu ka ŋolo, muɗaŋ iraŋay kiranu kuɗ slugota vaŋ ta ŋolda.

¹⁸ Ŋay iraŋ kay sa ma sunda vaŋɗi, kay nan ka hay lasta, humaŋ siɗawta vanu gosoyo.

¹⁹ Naŋay goboy tam ciwta vanu, buta' goyo, suɗan goyo kay sa gawt kanna.

²⁰ Naŋ wi curo'da vanu, zulota vanu hiɗi ŋulda vanu, sa ka gawt kanna kaf ka vokaŋu.

²¹ Ŋulda visiya ton sutayanawa, nan muɗi moyo. Nan cub kay sa ɗuw hawta vanu, may sa mayɗi. Kay sa ma ɗob-lawta, may nan fi saɗi.

²² Nisi cuk samna hay tina vanu, kay vat laata vanu, nisi vulan vinegre a ci'e.

²³ Hin tablena visiya muɗ goy jawta voksiya, va ma min muɗsi faraya ma muɗ goy jawta voksiya kaw.

²⁴ Hin irsi muɗ jufunu kay nisi fi wiɗi, hin fursi buratay dok-doko kaw.

²⁵ Yamaŋ ɦiyda vaŋ ta ŋolda goy kisiya, hin roŋŋa vaŋu co katsiya.

²⁶ Hin ziyna visiya muɗ goy waa'a, hin sa mus hay guɗukŋa visiɗi kaw.

²⁷ Kay nisi las sum sa naŋ watsina, nisi vi labara kay lasta vi sum sa naŋ kaasi tuwsi goy mili.

²⁸ Hinsi tap jiw-zlata tam jiw-zlata visiya, hinsi co tam ɗigerta vaŋɗi.

²⁹ ɦassi sesi goyo hay defterta vi sa irina, hinsi sesi ɗoy jar sa ɗigeraɗi kaw.

³⁰ May nanu sa ma hawi, hobay hiɗi yorta kaw, Lawna, hin su'da vaŋu musan kulo'o hay liyn ma ɗeŋe.

³¹ Nan min subur sem Lawna hiɗi nulla, nan min suburumu hiɗi gi-deɓta.

³² Kayni ŋaa'a kir Lawna suw put-gujuna ma miyok kalamu, tirek selemu kaw.

³³ Hay li ma sa ziy-zlata wi kayni, nisi ma li firiya. Nigi sa gar Lawna, hin dikgi mus iriya.

³⁴ Kay Ma-Vatɗina hum siɗawta vi sa hawna, sa daŋgayna valamu nam ɗuwsi birek-cekɗi.

³⁵ Wuralawna hiɗi nagata ma tiyim selemu, niy-ŋolla hiɗi sle ma geɗ hayam petna kaw.

³⁶ Kay Lawna min suɗ Siyon, in hoyok-ziyna vi Yuda kulo'o kaw, nisi ma lak ɗawni, hoyok-ziyn ma muɗ fisina kaw.

³⁷ Jafna vi sa sunda valamu ma fum ki vocota visi nala, nisi sa min semda valamu ma lak hayamu.