NULLA 68 - BIBALDA TA PELDETTA

¹ Tam ma ŋolla vi sa gi nulla. Nulla vi David.

² Lawna fok kulo'o, sa gawt kalamna mer goyo, nisi sa ka gawt talamu pir goy vokomu.

³ Naŋ fosi goyo ki no'osna dol goyo nala, sa jiw-zlata ba goy vok ir Lawna ki dubaŋŋa duwal goyo vok kuta nala.

⁴ Sa ɗigera li firiya, nisi siwel hiɗi kolda vok Lawna. Awa, nisi siwel hiɗi firita.

⁵ Gigi nul tam Ma-Vatɗina, gigi nul ma suburta tam semda valamu. Kotgi hagata kay sa ma tuɗ vokomu hay fulu, Ma-Vatɗina kayni semda valamu, siwelgi hiɗi firita vok iramu.

⁶ Namu mi bum sa kuyuna, nam sa ma ka kitata vi boy sa duhulla kaw, nam Lawna hay liyn ma musta valam peldete.

⁷ Lawna vul ziyna mi sum sa noyay goyna, nam but sa daŋgayn goyo, vulsi sle'ta; may sa ŋel gatta hin lak hay nagata ta waray goyta.

⁸ Lawna, hay li ma naŋ kalay goyo vok sumuna vaŋu, hay li ma naŋ tun voksiya hay fulda, Gi-suk.

⁹ Nagata wira, dukalawna ɦuwal goyo vok iraŋu, Hiɗiyt Sinay wira vok ir Lawna, vok ir Lawna vi Israyel.

¹⁰ Lawna, naŋ vul niy ma sina asaya, naŋ kot vocota vaŋ kulo'o hay li ma na' ay maŋaya,

¹¹ Sumuna vaŋu in ziyna visiya hay nagata, ta naŋ Lawn kuɗ ŋaata vaŋu kota' kay sa hawna.

¹² Bum-Sumun di yoboyn kepe, tokŋ ŋolla vi boyna jok labara goyo.

¹³ Muliyana vi vok-ma-duura pira, nisi pira, na'a ta hini vota ɓuraw sle ma ɓuraŋŋa.

¹⁴ Hay li ma nigi ka tun sukgi jar ciŋana vi fok-dimina, gilaŋatna vi gukka ka setay hiɗi doorota, zlimitna va'a ki ora ma ciliŋŋa nala kaw.

¹⁵ Hay li ma ma gaŋeraŋ-petna mer muliyana vi nagata goyo, nagat muɗ haɓi ki futuw-mogoyna vi Talmon nala.

¹⁶ Hiɗiyna vi Lawna, hiɗiyna vi Basan, hiɗiy ma gurayna ma kulo kay hiɗiy hegena, hiɗiyna vi Basan,

¹⁷ Nigi hiɗiy fiyokŋa, hiɗiyta ta kir Lawna ŋaa'a kay musta valamu, nigi ɗuwa' birek-ceke kay mige? Lawna min mus haya ta-ta hay vatɗita.

¹⁸ Kekena vi Ma-Vatɗina ka birim dok-ma', ka ir birimi birimi lo, Bum-Sumuna ka jaramu, Hiɗiyt Sinay ka hay liyn ma peldetna.

¹⁹ Naŋ kalay hay liyn ma kulona, naŋ kal sa gorvona goy ɗawni. Naŋ vi vulda jar sumuna, Awa, jar sa ŋel gatta kaw, kay Ma-Vatɗina Lawna fi mus ɗawni.

²⁰ Gi deɓ mi Bum-Sumuna hay buurta buurta kaf, la sa tun va ma nek kaya, Lawna mi su'da vaya. Gi-suk.

²¹ Lawna nam mi Lawna vi su'da vaya, kay hay gal Ma-Vatɗina Bum-Sumuna, hagata ta pir goy kay mitta ka'a.

²² Lawna min mun yam sa gawt kalamna goyo, nam min mun zok-ta'ara vi sa ma poy hay sulukŋa valamu.

²³ Bum-Sumuna di'e: Hay Basan pa nan ma hotsiyaya, hay zulla vi niy ŋolla pa nan ma hotsiyaya.

²⁴ Kay seŋu ma tay hay busuwna, kay durnayna vaŋu ma mut sa gawt-kaŋŋa.

²⁵ Nisi wi tu'da vaŋu, naŋ Lawna, tu'da vi Lawna vanu, tu'da vi mulla vanu kalaf hay liy ma peldetna.

²⁶ Sa gi nulla tuni voksiya, bugolsiya si sa ci dilla, jar guro-boyna si sa liw gilereŋŋa may.

²⁷ Suburgi Lawna hay tokŋa, Gigi deɓ mi Bum-Sumuna, nigi sa ka hay jafna vi Israyel,

²⁸ Benyamin kayni mi ma goora, nam ti mul kisiya, muliyana vi Yuda hiɗi tokŋa visiya, muliyana vi Zabulon, muliyana vi Neftali.

²⁹ Lawna vaŋu vulaŋ donotawa, Lawna, ɦur donota kuɗ va ma naŋ li kuma'a.

³⁰ Hay Tempella vaŋu hay Yerusalem, muliyana ma mar vulda taŋu.

³¹ Law ɗeŋe tam muura ma ka jar us-cerewna, law ɗeŋe tam luway-jufayna hiɗi guro-luwayna vi sumuna, sa girif gaa vokaŋu hiɗi doorota. Nam mer sum sa min duura goyo.

³² Sa gaŋeraŋa ma may goy hay Egipte pa, Etiopiya ma meɗ ɓa' goy gosoyo tam Lawna.

³³ Nigi sa hay mulda vi nagata kaf, gigi nul tam Lawna, gigi nul ma suburta tam Bum-Sumuna. Gi-suk.

³⁴ Gigi nul tam nam ma ka tuɗ hay liyn ma kulona, liyn ma kulona ma vatɗina, ɗuwgiya, nam di hiɗi delemu, del ma gaŋeraŋa.

³⁵ Vul gajijita tam Lawna, ŋolda valamu ka kulo'o kay Israyel, donota valamu ka hay ɗugulla kaw.

³⁶ Lawna, narta ŋolo ka kuɗaŋu, goy hay liyn ma peldetna vaŋ pa, Lawna vi Israyel, nam vul gaŋeraŋa hiɗi donota mi sumuna valamu, gi deɓta tam Lawna.