NULLA 66 - BIBALDA TA PELDETTA

1 Tam ma ŋolla vi sa gi nulla. Nulla.

¹ Tam ma ŋolla vi sa gi nulla. Nulla. Siwelgi hiɗi firita vok Lawna, nigi sa hay nagata pete.

² Gigi nul ma gajijita hay semda valamu, suburgi gajijita valamu.

³ Digi tam Lawn ala: Lopna vaŋu ɦuyumda kuɗum ŋolo, kuɗ ŋolda vi gaŋeraŋa vaŋu, sa gawt kaŋŋa ma suburaŋ hiɗi vunsiya.

⁴ Nagata kaf ma girifaŋu, nisi ma gi nul ma suburta taŋu, nisi ma gi nul ma subur semda vaŋu. Gi-suk.

⁵ Nigiyaya ɗuwgi lopna vi Lawna, nam li sle ma ŋulona ma wir-tuwna tam gurona vi sumuna.

⁶ Nam muɗ niy-ŋolla goy nagata ta ɗeŋe, hay niy-lumna nisi raw hiɗi sesiya, hay na'ta nay ma li firiya hay namu.

⁷ Nam li hiɗi gaŋeraŋa valamu ta-ta hay vatɗita, iramu ɗuw jaf-sumuna. Hin sum sa ŋel-gatta subur tuwsiɗi. Gi-suk.

⁸ Nigi jaf-sumuna, suburgi Lawna vaya, digi goy kay suburta valamu hiɗi delgi kulo'o.

⁹ Nam hin ciwta vaya mus iriya, nam hin sey geɗ goyɗi kaw.

¹⁰ Kay naŋ Lawna wakmaawa, naŋ wakmaawa ki sa yor doorota nala.

¹¹ Naŋ tuɗmaawa hay dena, naŋ tun jak ma nekŋawa pelma'a.

¹² Naŋ hin sumunawa jik kulo kuma'a; numa jikawa jar kuta hiɗi niyna. May naŋ yawmayawa goyo, kay vulma slen ŋolo dak-dak.

¹³ Nan min kal kalaf hay ziyna vaŋu hiɗi ɗifin ma ŋal-goyna, nan min hob vun sle ma nan yi kanu taŋu.

¹⁴ Va ma kal goy hay vunanu, va ma vunan dumu hay li ma nan ay hay lasta.

¹⁵ Nan min li ɗifin ma ŋal-goyna taŋu, hiɗi faray ma ɗorayna, hiɗi mula vi fok-dimina. Nan ma ŋat fok-dimina hiɗi fok-meena. Gi-suk.

¹⁶ Nigiyaya, humgiya nigi kaf sa li nar kuɗ Lawna, nan min digi kay va ma liyawa tam ciwta vanu.

¹⁷ Nan siwelawa talamu hiɗi vunanu, nul ma gi-deɓta ay hay vunanu.

¹⁸ La nan var kay va ma joo'o hay dikanu, Bum-Sumuna as humɗi.

¹⁹ May Lawna hum della vi siɗawta vanawa.

²⁰ Suburta tam Lawna, namu ma may noy siɗawta van goyɗi, ma yaw ŋaata valam goy kanɗi kaw.