NULLA 62 - BIBALDA TA PELDETTA

¹ Tam ma ŋolla vi sa gi nulla. Vi Yedutun. Nulla vi David.

² Ciwta vanu cubag ŋal kiliŋ kay Lawna kepe, su'da vanu may goy hayami pa.

³ Nam kepe mi hiɗiyna vanu hiɗi su'da vanu, mi ziyn ma ŋayna vanu, nan as geɗ noŋɗi.

⁴ Nigi ma mol kay san ki kayn nala ta-ta lancitige? Nigi kaf ma gar a ɦom gaa'a ki gulmun ma zori goy badalla nala, ki zlaɓn ma min ɦom goy nala ta-ta lancitige?

⁵ Nisi ŋra vunsi kay va maraɗi, may kay zutum gaa'a kay ŋolda valamu, nisi firiya kay sinda, nisi gi bol hiɗi vunsiya, may hay diksiya nisi buraha. Gi-suk.

⁶ Ciwta vanu, cubag ŋal kiliŋ kay Lawna kepe, su'da vanu may goy hayami pa.

⁷ Nam kepe mi hiɗiyna vanu hiɗi su'da vanu, mi ziyn ma ŋayna vanu, nan as geɗ goy noŋɗi.

⁸ Su'da vanu hiɗi gajijita vanu ka hay Lawna, hiɗiyta vi donota vanu ka hay Lawna, liyn ma ŋayna vanu ka hay Lawna.

⁹ Nigi sumuna, zamgi ɓalam dok-doko, digi goy vokomu slen pet ma hay dikgiya, Lawna mi liyn ma ŋayna vaya. Gi-suk.

¹⁰ Gurona vi sum-wurana mi va ɦawa, guro-jufayna vi sana mi sin ɦawa. La nisi kaf jik kulo kay va ma ŋa nekka kaw, nisi hefteŋ ki simeɗna ɦawa nala.

¹¹ Zam ɓam ɦawlataɗi, subur tuwgi kay faray ma kulinɗi kaw, la farayn ka wul ŋol kaw, tun ŋalda vigi kay kaynɗi.

¹² Lawna di sem kepe; sem ma', nan hum kayni, ala donota kayni vi Lawna.

¹³ Bum-Sumuna, ŋaata kaw vaŋ naŋu, kay san gigekaw naŋ vul talamu kuɗ lopna valamu valamu.