NULLA 6 - BIBALDA TA PELDETTA

¹ Tam ma ŋolla vi sa gi nulla. Hiɗi dil ma zigewn talamna. Hiɗi dil ma zigewn talam glafandina.

² Ma-Vatɗina, watan hiɗi ɦiyda vaŋɗi, gatan hiɗi ɦiyda vaŋ ta ŋoldaɗi kaw.

³ Laŋ slugot kanu Ma-Vatɗina, kay donota van mayɗi; yeran goy yerge Ma-Vatɗina, kay zokanu ka ɓasanu.

⁴ Ciwta vanu ka yor ŋolo, may naŋu, Ma-Vatɗina, ta-ta lancitige?

⁵ Hotaŋiya Ma-Vatɗina, butan ciwta van goy butge: Suɗan goy suɗu, kuɗ slugota vaŋu.

⁶ Kay hay mitta sa humam gum kaŋɗi, sa ma min suburaŋ seŋu hay liyna vi sa mitin ɗawn mi gige?

⁷ Sutiyan toowa kay tiyna; kay hay henjet kaf liy ma buura vanu ŋuruɓi hiɗi zimiyna. Zlatta buura vanu ŋuruɓi cukuslu'.

⁸ Iran kormoti kay kisna, nisi kaf sa ka lasanu ka muɗan iran kulo maari.

⁹ Tuɗgiya, hinanu nigi kaf sa li jiw-zlata, kay Ma-Vatɗina hum tiyta vanawa.

¹⁰ Ma-Vatɗina hum giɗel-delta vanawa, Ma-Vatɗina vi siɗawta vanawa.

¹¹ Sa gawt kanna kaf muɗawa zulo'o, muɗi nar ŋolo kaw, nisi hotawa bugolo, zulot nigawa gaa kisiya.