NULLA 59 - BIBALDA TA PELDETTA

¹ Tam ma ŋolla vi sa gi nulla. «Ɓulak slenɗi». Nulla vi David. Hay li ma Sawul cuk sumuna kay ŋuy ziyna, kay cum goyo.

² Lawna vanu, suɗan goyo kay sa gawt kanna, ŋomanu kay nisi sa yaw kulo'o kanu.

³ Butan goyo kay sa li lop ma bay-ɗigera, suɗan goyo kay sum sa ɦok busuwn goyna.

⁴ Kay ɗuwaŋu, nisi cub kay gar irita vanu. Ma-Vatɗina, sa donona tap tuwsi kanu, bay joota vanu hiɗi bay sulukŋa vanu.

⁵ Hiɗi bay-joota van pet kaw nisi ka jaŋa, nisi ka kot tuwsiya. Zliyaŋ kulo'o kay gut kuɗanu, ɗuwan kaw.

⁶ Awa, naŋ Bum-Sumuna Lawna vi vok-ma-duura, Lawna vi Israyel, fokaŋ kulo'o kay gat jaf-sumuna kaf, li slugota tam sa jiw-zlata sa joona noŋɗi. Gi-suk.

⁷ Nisi hotay hay vulatit kaf, nisi buw ki durnayna nala, nisi ŋuy hoyok-ziyna.

⁸ Nisi puruf yoboyn goy hay vunsiya, kew-gaferaŋa ka hay vunsiya, sa ma humsi ɗawn mi gige?

⁹ May naŋu Ma-Vatɗina, naŋ cen kuɗsiya, naŋ cen kuɗ jaf-sumuna kafe.

¹⁰ La donona visi ir nanige kaw, nan zamaŋgi mi ɓaŋ naŋu, kay naŋ Lawna mi liyn ma ŋayna vanu.

¹¹ Lawna vanu min ma tanu hiɗi ŋaata valamu, Lawna min hinan ɗuw sa gawt kanna hiɗi firita.

¹² Cisi goyɗi, kay sumuna vanu yisi ma jokɗi, mersi goy hiɗi donota vaŋu, zutsi gaa'a, naŋu kuroŋŋa vuma'a, Bum-Sumuna.

¹³ Yoboyn kaf ma nisi di hay vunsiya mi suluku, hinsi nig gaa'a hay jigal-tuwta visiya, nisi dum mi yoboy ma be'da hiɗi sinda.

¹⁴ Vatsi goyo hay ɦiyda vaŋu, vatsi goyo, hinsi lak iri loɗi, hinsi wi ala Lawna ti mulu kay Yakub, ta-ta hay dabaŋ-gu'ta vi nagata. Gi-suk.

¹⁵ Nisi hotay hay vulatit kaf, nisi buw ki durnayna nala, nisi ŋuy hoyok-ziyna.

¹⁶ Nisi poya gar tina, la nisi hobɗi kaw, nisi poy nala ta-ta henjet vata.

¹⁷ May nanu, nan min gi nul kay donota vaŋu; hay graw culum pa nan min gi nul hiɗi delan kulo'o kay ŋaata vaŋu, kay naŋu mi ziy ma donona ma duura, naŋu mi liyn ma ŋayna vanu, hay buur ma nan ka hay lasta.

¹⁸ Naŋ mi donota vanu, nan min gi nul taŋu, kay Lawna mi ziyna van ma donona ma duura, Lawna vanu ma slugona.