NULLA 58 - BIBALDA TA PELDETTA

¹ Tam ma ŋolla vi sa gi nulla. «Ɓulak slenɗi.» Nulla vi David.

² Nigi gurona vi sum-wurana, hay li ma nigi ziŋa, nigi ka di ɗigerta goy su? Nigi ka ka kitat hay liya'a su?

³ Mayɗi, hay dikgiya nigi li jiw-zlata, nigi tun kay va ma ŋa nekŋa sle ma ɓigi yawam hiɗi dono'o.

⁴ Sa jiw-zlata ay joo'o hay sumaysi pa, nisi viy goyo hay vu'da visi pa, nisi ka sinda kaw.

⁵ Sinawna visi ki sinaw guyna nala, Ki guy-makayna ma duk humamu nala,

⁶ nam hum del sum sa li gul-yalda hiɗi namnaɗi, La sum sa liskinna sa yal ŋolo kaw.

⁷ Lawna, tosi siysi kalaf haysiya, Ma-Vatɗina kusaŋ siy goor-zlona goyo.

⁸ Hinsi ba goyo ki niyn ma jaŋ goyna nala. Hin ɓarawta visi muɗi ki kusi goy nala, hay li ma nisi min ga' goyo.

⁹ Hinsi muɗ ki kiriŋŋa ma duwal goyo nala, ki goora vi cata nig gaa hay saŋ waŋi bay wi fatta nala.

¹⁰ Jew a ɓam gu ma zigiyna co tam dowayna vigiya, nam min yawam goyo hiɗi hiwliŋŋa, la ma ŋulomna la ma kut hayna kaw ŋray ca.

¹¹ Sa ma ɗigera ma li firiya hay li ma nam wi va ma hot kisina, nam ma muz selemu hay busuwna vi sa jiw-zlata.

¹² Sumuna ma di'e: Gasiya, wurakŋa vi sa ma ɗigera ka'a. Gasiya, Lawn ma ka kitata kay nagata ka'a.