NULLA 57 - BIBALDA TA PELDETTA

¹ Tam ma ŋolla vi sa gi nulla. «Ɓulak slenɗi». Nulla vi David. Hay li ma nam pir ŋay goy vok Sawul hay zul-hiɗiyna.

² Laŋ slugot kanu, Lawna, laŋ slugot kanu, kay nan ŋay taŋu, Awa, hay ŋus gilaŋatna vaŋu, nan gar liyn ma musta ta-ta ɓulak-goyta raw goyo.

³ Nan siwel tam Lawna ma ŋol ma kulona, tam Lawna ma li slen pet kanu.

⁴ Nam ma gi su'da valam ay kanu hay wuralawni pa, hay li ma sa ma min lasanu ka ŋulanu. Gi-suk Lawna ma gi ŋaata hiɗi gasita valamiya.

⁵ Ciwta vanu ka jar zlona; nan buri gaa jar sum sa puruf kut goyo. Sumun sa siysiya mi kaway-ma-duura hiɗi ɓarawi, sinsiya mi kew-gaferaŋi kaw.

⁶ Lawna, ɗek ŋolda vaŋ goyo hay liyn ma kulona, ɗek gajijita vaŋu gaa kay nagata pet kaw.

⁷ Nisi gan jawta gaa vokanu, kay guɗofan gaa'a, nisi jugoɗ zulda gaa vokanu. May nisi kay tuwsiya cuki gaa haya'a. Gi-suk.

⁸ Lawna, dikan coli dono'o, dikan coli dono'o, nan min gi nulu. Nan min gi nul hiɗi sle ma li nulla.

⁹ Ciwta vanu, zliyag kulo'o, dilla hiɗi dil ŋolla vanu, zliygi kulo'o, nan min gi nul ŋarpita.

¹⁰ Bum-Sumuna, nan min suburaŋu jar sumuna, nan min gi nul ma suburta taŋu jar jaf-sumuna.

¹¹ Kay ŋaata vaŋu ka ŋolo, ta-ta co tam liyn ma kulona, gasita vaŋu co ta-ta tam ɗugulla kaw.

¹² Lawna, ɗek ŋolda vaŋ goyo hay liyn ma kulona, hin gajijita vaŋu li gaa kay nagata kafe.