NULLA 56 - BIBALDA TA PELDETTA

¹ Tam ma ŋolla vi sa gi nulla. Kay gukka vi terebintena ma ginena. Nulla vi David. Hay li ma sum sa Filistin fumu hay Gad.

² Lawna, lan slugota lige, kay sumuna min ligan goyo, busa he' nisi hebanu hiɗi duura.

³ Buurta kaf sa gaw kanna ka hebanu, nisi ka ŋolo, nisi ka duranu, Lawn ma ŋolla.

⁴ Hay buur ma nan ka hay narta, nan zamaŋ ɓaŋu.

⁵ Nan min subur Lawna kuɗ yoboy ma nam dumna; nan vi hay Lawna, nan may li narɗi; sumun as kay lum tanu mi mige?

⁶ Busa he' nisi muɗ yoboyna van goy waa'a, varta visi ta kanta pet ti varta ta joota.

⁷ Nisi tap tuwsiya, nisi ŋay tuwsi goy lak' kay peɗ tu'da vanu, kay nisi gar irita vanu.

⁸ Nisi fi pir goyo hiɗi joota visi su? Lawna, hay ɦiyda vaŋu, zutaŋ jaf-sumun gaa'a.

⁹ Sen ma tilar goyna naŋ ŋam kafe; vaŋ zimiyna van kulo'o hay kolbota vaŋu: Nam may ɗoy hay ɗerwella vaŋɗi su?

¹⁰ Hay na'ta sa gawt kanna ma hot bugolo, Hay fat ma nan ma siwela. Kayni nan wi'e, Lawna ka hiɗi nanu.

¹¹ Nan min subur Lawna kuɗ yoboy ma nam dumna, nan min subur yoboyna vi Ma-Vatɗina;

¹² nan vi hay Lawna, nan may li narɗi, sumun as kay lum tanu mi mige?

¹³ Lawna, nan min hob vun sle ma nan yi kanu, nan min li lop ma hot gi-deɓta taŋu,

¹⁴ kay naŋ but ciwta vanawa goy vun mitta, Awa, ŋoman senu kay nan ma nig gaaɗi, kay nan fi poy vok Lawna hay haraŋa vi sa irina.