NULLA 52 - BIBALDA TA PELDETTA

¹ Tam ma ŋolla vi sa gi nulla. Nulla vi David.

² Hay li ma Doweg ma Edomna co di tam Sawul ala: David kalay hay ziyna vi Akimelek.

³ Sa ma gaŋeraŋa, naŋ subur tuwaŋ kay joota kay mige? Ŋaata vi Lawna ka dok-doko.

⁴ Sinaŋu niŋam mi law ma ɗutna, ki kew-beleta ta siya nala. Naŋ sa ma ɗutna.

⁵ Naŋ min joota suw ŋaata, min sinda suw yoboy ma ɗigere kaw. Gi-suk.

⁶ Naŋ min yoboyn pet ma ɓulak va goyo, ɗutta hay vunaŋu kaw.

⁷ Nala Lawn ma ɓulakaŋ goyo kay dok-doko. Nam ma vaŋu, tanaŋ goy hay guɗukŋa vaŋ pa; nam ma pataŋ so'olaŋ goyo hay nagata vi sa irina. Gi-suk.

⁸ Sa ɗigera ma wi kayni, li nar kaw, nisi ma cen kuɗumu di'e:

⁹ Ɗuwgiya, kayni mi sa ma hin tuwam hay ŋomda vi Lawnɗi, mi sa ma tun vida valamu kay farayna valam ma ŋolla, ma muɗ tuwam dono'o kay jiw-zlata valamu.

¹⁰ May nanu, nan mi gu-olive ma goɗa nala hay ziyna vi Lawna. Nan zam ɓam Lawna dok-dok hay vatɗita.

¹¹ Nan min suburaŋu ta-ta hay vatɗita, kay naŋ li slen kaynawa, nan min cub hiɗi sle'ta hay semda vaŋu, kay kayni ŋaa'a vok sa peldetna vaŋu.