NULLA 50 - BIBALDA TA PELDETTA

1 Nulla vi Asaf.

¹ Nulla vi Asaf. Lawna, Lawn Ma-Vatɗina kus yoboynawa, nam yi nagata hay dayta vi fatta pa ta-ta na' ɗig gaa'a.

² Goy hay Siyon, pasiyakka vi jifiyta, Lawna wile goyo.

³ Nam ka ma'a, nam Lawna vaya, nam may mus kiliŋɗi, kuta ŋal slena ka vokomu, birina ŋolo ka ŋuyumu.

⁴ Nam siwel kulo'o tam wuralawna, tam nagata kaw, kay ka kitata vi sumuna valamu.

⁵ Tokgi sa peldetna van tanu, nisi sa jun bonotawa hiɗi nanu hay ɗifinna.

⁶ Wuralawna di goy kay ɗigerta valamu, kay Lawna kay tuwamu ma ka kitata. Gi-suk.

⁷ Humgiya, nigi sumuna vanu: Nan min di va'a, Nigi sa Israyella, nan min digi kirgiya, nanu mi Lawna, Lawna vigiya.

⁸ Nan min lawgi kayni may kay ɗifinna vigiɗi, ɗifinna vigi ma ŋal-goyna ka vok iran dok-doko.

⁹ Nan min yaw luway ma jufayna goy hay ziyna vigiɗi, yaw fok-ŋekŋa goy hay ciŋana vigiɗi kaw.

¹⁰ Kay muur ma kuɗ jurut kaf kayni mi fanna, muur ma kulo kay hiɗiyn gu' gu' kayni mi fanna.

¹¹ Nan wi layayn ma kay hiɗiyna kafe, sle ma geɗ kay nagata kaf kayni mi fanna.

¹² La mayt ka canu, nan di kayni goy tam saɗi, kay nagata kayni vanu hiɗi sle ma haya'na kaf.

¹³ Nan ti sliw luway-jufayna su? Nan ci busuw fok-ŋekŋa su?

¹⁴ Vul tam Lawna ɗifinna vi lop ma slugona, hob vun sle ma naŋ yi kaŋu kat ma Kulo-Jamna.

¹⁵ Yaŋ semda vanu hay li ma naŋ ka vun-zlata; nan ma butaŋ goyo, nan ma vulaŋ gajijita.

¹⁶ May tam sa jiw-zlata Lawna di'e: Mi mige? Naŋ ŋa vun-ma-gatna van goyo, bonota van ka hay vunaŋu ɦawa.

¹⁷ Naŋ ma ka gaw hiɗi gatta vanu, naŋu ma gi yoboyna van goy bugolaŋu kaw.

¹⁸ Hay li ma naŋ wi sa ma kulla, naŋ ŋra vunaŋ hiɗi namu, naŋ tap hiɗi sa zlata-bulona kaw.

¹⁹ Naŋ vul vunaŋ goy tam joota, sinaŋu gar yoboyn ma ɗutta kaw.

²⁰ Naŋ mus gaa'a, law kat ɓasuŋŋa, yaw dir goora vi suŋu kaw.

²¹ Slen kayni naŋ lumu, nan di vaɗi kaw, naŋ var ala nan ŋray ca hiɗi naŋu, may nan min gataŋu, nan min lak slen kaf goy vok iraŋu.

²² Wulini ligi ŋali, nigi sa yigi jok Lawn goyo, La nigi li ŋalɗi, nan ma jetgi goyo, sa ma fi butgi goy mayɗi kaw.

²³ Sa ma li ɗifinna vi lop ma slugona tanu slan yan kulo'o, sa ma mus jigere hay hagata valamu, nan ma hinim wi su'da vi Lawna.