NULLA 44 - BIBALDA TA PELDETTA

¹ Tam ma ŋolla vi sa gi nulla. Nulla vi gurona vi Kore.

² Lawna, numa humawa hiɗi humma'a, sumayma duma'awa kaw kay lopna ma naŋ lum hay buura visiya, hay buur ma ɓa-ɓana.

³ hiɗi ɓaŋu naŋ digiɗ jaf-sumun goyo, kay nisi lak hay baŋalsiya. Naŋ ci jaf-sumuna goyo kay nisi mer goy baŋalsiya.

⁴ Kay nisi yaw nagan kayni may hiɗi donota visiɗi, suɗsi goy kayni may mi gilaŋsiɗi. May suɗsi goy kayni ti ɓaŋ ta jufta hiɗi gilaŋataŋu, hiɗi haraŋa vi vokaŋu, kay naŋ minsiya.

⁵ Lawna, naŋu mi mulla vanu: Vulaŋ hagata kay but Yakub goyo.

⁶ hiɗi naŋu, numa ma ɦo sa gawt kuma'n gaa'a, hiɗi semda vaŋu, nisi sa yaw kulo kuma'na numa ma taysi gaa'a.

⁷ Kay nan may viy kuɗ ɓarawta vanɗi, kew-gaferaŋa vanu fi suɗanɗi kaw;

⁸ May naŋu mi ma butma goy hay ɓam sa gawt kuma'na, sa ka gawt kuma'na naŋ muɗsi goy zulo'o kaw.

⁹ Hay Lawna numa subur tuwma'a busa he', numa min gi deɓ mi semda vaŋu ta-ta hay vatɗita. Gi-suk.

¹⁰ May wulini naŋ cukma'awa goyo, naŋ hinmaawa muɗ zulo'o. Naŋ min tuɗ goy kuɗ vok-ma-duura vuma'ɗi kaw.

¹¹ Naŋ hinma hot bugolo vok sa gawt kuma'na, nisi sa ka gawt kuma'na tuma' ɓuraŋi kaw.

¹² Naŋ vulma goyo ki fok-dimin nala a nisi mutma'a, naŋ merma goy jar jaf-sumuna kaw.

¹³ Naŋ gus sumuna vaŋ goy waa'a ɦawa, naŋ ka gusta visi ŋolɗi kaw.

¹⁴ Naŋ muɗma goy puru kir sugolayma'na, sum sa ŋuyi katma'ana ka burahma'a, ka cen kuɗma'a kaw.

¹⁵ Naŋ muɗma goy a sumun tunma nulu, nisi gila yisi kuma'a jar sumuna.

¹⁶ Zulota van ka vok iran dok-doko, iran kusuɓi kay zulota.

¹⁷ Hay della vi nam ma ŋulanu, panan kaw, vok ir sa ma gawta hiɗi sa ma job yalamna.

¹⁸ Kayni kaf as co kuma'a, nir na'ta kep yuma jokaŋɗi, numa'a hin bonota vaŋ goyɗi kaw.

¹⁹ Dikma'a may cal goy noŋɗi, sema'a may cal hagata vaŋ goy noŋɗi kaw,

²⁰ kay a naŋ kirapma gaa hay zulla vi cekemna, kay a naŋ kusuɓma hiɗi ŋus-mitta.

²¹ La yuma jok semda vi Lawna vuma'a, la numa meɗ ɓuma kulo kat lawayn ma pulla,

²² Lawn as fek kayni goyɗi su? Nam ma wi varta ŋayayta vi dikga.

²³ May kuɗaŋ naŋu nisi ka ŋatma goyo hay buurta kaf, nisi ka ɗuwma'a ki fok-dimi ma tuɗum kay ŋatam goyo nala.

²⁴ Zliyaŋ kulo'o Bum-Sumuna, naŋ kal sen kay mige? Fokaŋ kulo'o, cukma goyo ta-ta hay vatɗitɗi.

²⁵ Naŋ ŋay vokaŋu kay mige? Yaŋ jok hawta vuma'a hiɗi lasta vuma'a kay mige?

²⁶ Kay ciwta vuma'a ka wati gaa kay nagata, numa ka juni gaa kay butuwna.

²⁷ Fokaŋ kulo'o, gut kuɗma gutge, kay slugota vaŋu butma goy butge.