NULLA 42 - BIBALDA TA PELDETTA

ƊERWELDA TA MA'TA

¹ Tam ma ŋolla vi sa gi nulla. Nulla vi gurona vi Kore

² Ki dukga tiy kay niy-lokŋa nala, nan kaw dikan ka tiy kaŋu, Lawna.

³ Ciwta vanu laat ka la'a kay Lawna, Kay Lawn ma irina nan ma tuɗ kay col vok ir Lawn ɗawn lancitige?

⁴ Zimiyna vanu kayni mi funa vanu, falayta hiɗi henjeta kaw, kay busa he' nisi danu: Lawna vaŋu ka arige?

⁵ Slen kayni hay li ma human ganawa kalamu, ciwta van yor ŋolo: Kayni hay li ma nan ay ŋuyi hiɗi tokŋa, hay li ma nan ay tuni voksiya, kay tuɗ hay ziyda vi Lawna, jar ciriyna hiɗi nul ma suburta, tokŋ ŋolo ay hay yuldeta.

⁶ Ciwta vanu, sutiyag toya, nak yor kalaf hayanu kaw kay mige? Zamag ɓam Lawna, kay nan ma suburumu lo; namu mi su'da vanu hiɗi Lawna vanu.

⁷ Ciwta vanu sutiya' toya hayan kalafi, nala kaw nan var kayn kaŋ naŋu, fokay hay nagata vi Yordan pa, fokay hay Hermon pa, fokay hay hiɗiyta vi Mitseyar pa.

⁸ Billa yi bil hena, hay li ma nam hum del niyna vaŋ ma ka sulura. Ɓalla vaŋu hiɗi billa vaŋu ka sulur kulo kanu.

⁹ Hay falayta, Ma-Vatɗina vulan slugota valamu, hay henjeta nan gi nul kay suburum selemu, nan ka siɗaw tam Lawn ma irina vanu.

¹⁰ Nan min di tam Lawna, hiɗiyna vanu: Yaŋ jokanawa kay mige? Nan ma poy hay sligar ma yorta kuɗ gaŋeraŋa vi sa gawt kanna kay mige?

¹¹ Zokan kusiya hay li ma sa gawt kanna ŋulanu, hay li ma nisi di tan dok-dok ala Lawna vaŋ ka arige?

¹² Ciwta vanu, sutiyag toya, nak yor kalaf hayanu kaw kay mige? Zamag ɓam Lawna, kay nan ma suburumu lo; namu mi su'da vanu hiɗi Lawna vanu.