NULLA 41 - BIBALDA TA PELDETTA

¹ Tam ma ŋolla vi sa gi nulla. Vi David.

² Sle'ta ka kay nisi sa var kay sa hawna, kay Ma-Vatɗina ma suɗsiya hay buur ma joona.

³ Ma-Vatɗina min koɗ ŋarak kalamu, ŋom irita valamu kaw. Nam ma mus hiɗi bolda kalamu hay nagata, gasi naŋ min vulum goy tam minda vi sa gawt kalamnɗi.

⁴ Ma-Vatɗina ma gut kuɗumu hay li ma nam bur moyo, naŋ muɗum ŋaa'a hay moyna valam kafe.

⁵ Nan di'e: Ma-Vatɗina, lan slugota lige, muɗ ciwta van goy ŋaa'a muɗge. Kay nan li sulukawa kataŋu.

⁶ Sa gawt kanna di joo kan ala: Nam ma mit lancitige? Selem ma ɦas goy lancitige?

⁷ Hay li ma sa co kay ɗuwanu, nam di yoboy ma sinda, nam tok sinda hay dikamu, tuɗ da' goyo.

⁸ Nisi kaf sa gawt kanu kuɗuk tuwsi kanu, nisi ŋra vunsiya kay lan joo'o.

⁹ Nisi di'e: Va ma joo gaɓi talamu, nam ma bur gaa ɗawni, hot fok kulo loɗi.

¹⁰ Sa ma nan musi hiɗi namu hay sle'ta, ma nan var ala nam mi sa ma gasina, sa ma ti fun hiɗi nanu kaw, nam sli dubukam kulo'o katanu.

¹¹ May naŋu, Ma-Vatɗina, lan slugota lige, fokaŋ kulo'o kaw, nala nan ma li va tisiya.

¹² Nala nan ma wi ala nan kiraŋ ŋaa'a, la sa ma gawt kanna fi a kol kanɗi.

¹³ Nanu, naŋ vanawa kulo'o kuɗ bay-joota vanu, naŋ musanawa vok iraŋu ta-ta hay vatɗita.

¹⁴ Gi-deɓta tam Ma-Vatɗina, Lawna vi Israyel, hay vatɗita pa ta-ta hay vatɗita Amen! Amen!