NULLA 40 - BIBALDA TA PELDETTA

¹ Tam ma ŋolla vi sa gi nulla. Nulla vi David.

² Nan tun vida vanu hay Ma-Vatɗina, nam her gaa tanu, hum siwelda vanu kaw.

³ Goy hay zulda vi ɓulak-goyta pa nam van kulo'o, goy hay turoɓ ma zulu, nam tunan sen kulo kay hiɗiyna, nam muɗan poy dono'o.

⁴ Nam tun nul ma wuliya hay vunanu. Nul ma suburta tam Lawna vaya. Sumun ŋolo wi kayni, nisi li nari, vi hay Lawna kaw.

⁵ Sle'ta ka kay sa ma tun vida valam hay Ma-Vatɗina, muɗ tam sa jigal tuwsinɗi, tam sa sindaɗi kaw.

⁶ Ma-Vatɗina Lawna vuma'a, lop ŋulo ŋulo ma naŋ lum tuma'a, hiɗi varta ta naŋ vara' kuma'a ka ŋolo. mara ma ŋray hiɗi naŋu mayɗi; nan min siwel goy kay sle namna, may nam suwi ŋolo a nan di goy kalamu.

⁷ Ɗifinna hiɗi vulda vi hambulla naŋ may daramɗi, naŋ duɓan humanawa ɗifin ma ŋal goyna hiɗi ɗifin ma kay sulukŋa naŋ job kalamɗi.

⁸ Nala nan di'e: Wulini, nan ka co'o hiɗi ɗerwel ma ɗutina ma ɗoy kanna.

⁹ Lawna vanu, nan firiya kay li minda vaŋu, vun-ma-gatna vaŋu ka hay dikanu kaw.

¹⁰ Nan di labara ma firina kay ɗigerta hay tokŋ ma ŋolla, humaŋu, nan as duk vunanɗi, kay Ma-Vatɗina, naŋ wi'e.

¹¹ Ɗigerta vaŋu nan ŋaya' kalaf hay dikanɗi, nan di goy kay gasita vaŋu hiɗi su'da vaŋu; nan as kay ŋay ŋaata vaŋu hiɗi gasita vaŋu jar tokŋ ma ŋollaɗi.

¹² Ma-Vatɗina, tel slugota vaŋ goy kanɗi. Hin ŋaata vaŋu hiɗi gasita vaŋu ŋoman dok-doko.

¹³ Kay joot ŋolo ŋuyanawa, wurakŋa vi jiw-zlata vanu coowa tanu, nan as ɗuw kulo noŋɗi kaw; joota biyay ŋolo suw ɗuŋus ma kanna, teŋ-irta van tay loɗi kaw.

¹⁴ Butan goy butge Ma-Vatɗina, naŋay gosoyo kay gut kuɗan gutge! Ma-Vatɗina.

¹⁵ Hin nisi kaf sa gar irita vanu muɗ zulo'o, caw yuloŋ' kaw, nisi sa min irita vanu kay yawa' goyo, hinsi hot bugolsiya muɗ zulo'o kaw. Nisi sa min bata-goyta vanu.

¹⁶ Hin nisi sa cen haha! Kanu muɗ nari hin zulot visiya.

¹⁷ Hin nisi kaf sa garaŋu li firiya mus firi hay naŋu. Hin nisi sa min su'da vaŋu di dok-dok ala: Suburta ŋolo tam Ma-Vatɗina.

¹⁸ May nanu mi sa ma hawi, ɦawa kiɗaŋ-kiɗaŋ'; May Bum-Sumuna ka var kanu. Naŋu mi ma gutda vanu hiɗi ma butan goyna; Lawna vanu, naŋay gosoyo, cubɗi.