NULLA 38 - BIBALDA TA PELDETTA

¹ Nulla vi David. Kay gi humda

² Ma-Vatɗina, watan hay ɦiyda vaŋɗi, gatan hiɗi lasta hay ɦiyda vaŋ ta ŋoldaɗi.

³ Kay ɓarawta vaŋ vanawa, ɓaŋ burawa neke kanu kaw.

⁴ Sliwan pet may ŋaa loɗi kay ɦiyda vaŋu, firit may hay zokan loɗi kaw kay sulukŋa vanu.

⁵ Kay jiw-zlata vanu suwan yanu, na' suw donota vanu ki jak ma neke nala.

⁶ Milla van his joo'o, buwiya kaw kay ɦay-ɦayta vanu.

⁷ Nan hormosi gaa'a, sutiyan toy kiɗa-kiɗa', buurta kaf nan poy hay yorta.

⁸ Kay ruwatan waran ki kut nala, va ma ŋaa'a may hay sliwan noŋɗi.

⁹ Donota van mayɗi, tuwan kusi kica-kica', nan tiy hiɗi delan kulo ŋolo, kay sutiyan toya.

¹⁰ Bum-Sumuna, darta van kaf ka vok iraŋu, sutiyan ma toyna may ŋayay kiraŋɗi.

¹¹ Dikan daban ŋolo, donota van vatawa, haraŋa vi iran kaw vatay goyo.

¹² Boniyonna hiɗi sugoliyonna lak goy gine'e vok lasta vanu, sa hay jafna vanu kaw lak goy gine'e hiɗi nanu.

¹³ Nisi sa gar a can goyo gan jawta vokanu, nisi sa gar a lan joo'o kus yoboy ma joona, nisi busa he' var kay ɗutta.

¹⁴ May nanu ki sa ma gidiŋi nala, humɗi, ki sa ma numulla nala kaw, mal vunam goyɗi.

¹⁵ Awa, nanu ki sa ma humɗi nala, ki sa ma ci-wayt may hay vunamɗi nala.

¹⁶ Kay hay naŋu Ma-Vatɗina, nan cub hiɗi sle'ta, Bum-Sumuna Lawna vanu, naŋ ma hotan ditiya.

¹⁷ Kay nan di'e: La naɗina nisi ma subur tuwsi kanu, hay li ma senu geɗ goyo, nisi ma subur tuwsi katanu.

¹⁸ Kay nan goboy nig gaa'a, zumalda vanu ka vokan dok-doko.

¹⁹ Kay nan min ham jiw-zlata van goyo, tiy kay sulukŋa vanu kaw.

²⁰ May sa gawt kanna ka iriya nisi dono'o kaw. Nisi sa ka gawt kanu bay joota vanu ka ŋolo.

²¹ Nisi hotan joota kay ŋaata vanu, nisi yaw kulo kanu kay mige nan gar ŋaata.

²² Ma-Vatɗina hinanɗi, Lawna vanu, mus gine'e hiɗi nanɗi.

²³ Naŋay gosoyo kay gut kuɗanu, naŋ Bum-Sumuna, su'da vanu.