NULLA 37 - BIBALDA TA PELDETTA

1 Nulla vi David.

¹ Nulla vi David. Naŋ muɗ ɦiy kuɗ sum sa joonɗi, dikaŋ roŋ kuɗ nisi sa li bay-ɗigertaɗi.

² Kay nisi ma kaays goy gosoyo ki usna nala, nisi ma so goyo ki us ŋulomna nala.

³ Vaŋ hay Ma-Vatɗina, laŋ ŋaata kaw, musaŋ hay nagata, ti vunaŋ kuɗ ɗigerta kaw.

⁴ Firiyaŋu hay Ma-Vatɗina, nala nam ma vulaŋ va ma dikaŋ dara.

⁵ Hin tuwaŋ hay ɓam Ma-Vatɗina, tun vida vaŋ hayamu kaw, nala nam ma li va'a.

⁶ Nam ma ɗek ɗigerta vaŋ goyo ki haraŋa nala, nam ma ɗek gasita vaŋ goyo ki fatta hay falay calak nala.

⁷ Musaŋ kiliŋi vok Ma-Vatɗina, Zamam ɓalamu, sa ma halalda ka kuɗum hay hagata valamna naŋ ma muɗ ɦiy katamɗi, muɗ ɦiy kat sum sa var kay li joonɗi kaw.

⁸ Hinaŋ ɦiyd goyo, hinaŋ roŋŋa vi dikaŋ goyo, naŋ ma muɗ ɦiyɗi, kay kayni ti joota.

⁹ Kay sa joona ma kaays goyo, may nisi sa zam ɓam Ma-Vatɗina ma fi nagata hay vocota.

¹⁰ Hini mus neeɗa ɦawa sa ma jiw-zlata may loɗi, la naŋ sar hay baŋalam kaw nam may loɗi;

¹¹ Nisi sa ka ziy lasta ma fi nagata hay vocota, nisi ma li firi hiɗi toyta ŋolo.

¹² Sa ma jiw-zlata var kay li joot kat sa ma ɗigera, nam mut siyam katamu kaw.

¹³ Bum-Sumuna cen kuɗumu, kay nam wi ala buura valam ka ma'a.

¹⁴ Sum sa joona pat kew-gaferaŋa visi goyo, nisi nir ɓarawta visi goyo kaw, kay gi sa ma vun lasta hiɗi sa ma hawn gaa'a, kay ci goyo nisi sa poy ɗigere kaw.

¹⁵ Kew-gaferaŋa visiya ma jik diksiya, ɓarawta visiya ma kus goyo kaw.

¹⁶ Va ma kiɗayna vi sa ma ɗigera nam ŋaa'a suw faray ma ŋolla vi sa ma jiw-zlata.

¹⁷ Kay ɓam sa jiw-zlatna ma kus goyo, may Ma-Vatɗina ma gut sa ɗigera.

¹⁸ Ma-Vatɗina wi buura vi sa gasina, vocota visiya ka ta-ta hay vatɗita.

¹⁹ Hay liyn ma joona nisi ma muɗ zuloɗi, hay buur ma mayta nisi ma hoba.

²⁰ May sa jiw-zlatna ma ba goyo, sa ka gawt tam Ma-Vatɗina ma muɗ ki ɓona vi usna nala, nisi ma sah goyo, sahis goyo jar no'osna.

²¹ Sa ma jiw-zlata ni balla, may wurakɗi, may sa ɗigera wi hawta vi sa'a, vul va goy kaw.

²² Kay nisi sa Lawna gi bol kisina ma fi nagata hay vocota, may nisi sa nam beɗsi goyna ma kaays goyo.

²³ Ma-Vatɗina kot poyta vi san dono'o, Hagata valamu kiram ŋaa'a kaw.

²⁴ La nam sli zlaraŋgaɗaya kaw, nam puk gaa kay nagat kursulɗi, kay Ma-Vatɗina vum ɓalam kulo'o.

²⁵ Nan ay joriyo'o, wulini nan muɗi maari, may nan wi sa ma ɗigera hini goyɗi, jafna valamu siɗaw funɗi kaw.

²⁶ Busa he' nam li slugota, vul bal kaw, jafna valamu fi bolda kaw.

²⁷ Hinaŋ joot goyo, laŋ ŋaata, naŋ ma mus hay ziyna vaŋu ta-ta hay vatɗita.

²⁸ Kay Ma-Vatɗina min sa ɗigera, nam hin sa peldetna valam goyɗi, nam ŋomsi ta-ta hay vatɗita, may jafna vi sa jiw-zlata ma kaays goyo.

²⁹ Sa ɗigera ma fi nagata hay vocota, nisi ma lak haya ta-ta hay vatɗita.

³⁰ Vun sa ma ɗigera kus yoboy ma yalla, Sinamu kaw di sle ma ɗigera.

³¹ Gatta vi Lawna valamu ka hay dikamu, selemu ma geɗ goyɗi kaw.

³² Sa ma jiw-zlata cigeɗ sa ma ɗigera, gar a cum goyo kaw.

³³ Ma-Vatɗina min hinim hay ɓalamɗi, hay li ma nam ka vun kitat kaw, Ma-Vatɗina hin kitat nig kalamɗi.

³⁴ Zamaŋ ɓam Ma-Vatɗina, ŋomaŋ hagata valamu kaw, nala nam ma muɗaŋ ŋolo kay naŋ ma fi nagata hay vocota, Naŋ ma wi'e nanige sa jiw-zlata ma kaays goyo.

³⁵ Nan wi sa ma joona hiɗi gaŋeraŋa valam kafe, ɓalam ɓet goyo ki gu ma goɗna nala.

³⁶ Nam capawa, wulini nam may loɗi; nan garamu, may as fum loɗi.

³⁷ Vargi kay sa ma bay-joota, ɗuwgi sa ma ɗigera; sana vi toyta jafna valam ka'a.

³⁸ May sum sa ŋel-gatta kaf ma ɓulak goy waa'a, Vokka vi sa jiw-zlata ma kaays goyo.

³⁹ Su'da vi sa ɗigera may goy vi Ma-Vatɗina pa, nam mi liyn ma ŋayna ma donona visiya hay liyn ma lasta.

⁴⁰ Ma-Vatɗina gut kuɗsiya, suɗsiya kaw, yawsi goy hay ɓam sa jiw-zlata pa, nam suɗsiya kay nisi gar liyna visi ma ŋayna talamu.