NULLA 36 - BIBALDA TA PELDETTA

1 Tam ma ŋolla vi sa gi nulla,

¹ Tam ma ŋolla vi sa gi nulla, ma sunda vi Ma-Vatɗina, nulla vi David.

² Yoboy ma liwisna vi sa ma joona ka hay dikam kalafi; narta kuɗ Lawna may vok iram noŋɗi.

³ Nam subur tuwamu kir tuwam ɗeŋe, nam hin sulukŋa valamu ma goy kiram haraŋɗi, ka gaw hiɗi namɗi kaw.

⁴ Yoboyna vi vunamu mi sinda hiɗi ɗutta; nam noy yalda goyo, noy ŋaat goyo kaw.

⁵ Nam var kay bay-ɗigerta gaa hay liyn ma buura valam waŋ', nam mus hay hagata ta tay ŋaaɗita, nam ka gawt hiɗi jootɗi kaw.

⁶ Ma-Vatɗina, slugota vaŋu co tam wuralawna, gasita vaŋu co ta-ta tam ɗugulla.

⁷ Ɗigerta vaŋu ŋray hiɗi hiɗiy ma fiyokŋa vi Lawna, kitata vaŋu ŋray hiɗi zul ma wiŋŋa. Sumuna hiɗi muura kaw naŋ suɗsi goyo.

⁸ Lawna, ŋaata vaŋu jifiy ŋolo natige. Gurona vi sumuna gar musta ŋaata gaa kuɗ ɗuŋus glaŋataŋu.

⁹ Nisi ma hob ŋolo hiɗi sle ma ŋaana ma hay ziyna vaŋu, naŋ ma vulsi a ci'e goy hay niy-lumna vi firita vaŋu.

¹⁰ Kay kaata ta law niyn ma irina ka kataŋu, hay haraŋa vaŋu numa ka wi haraŋa.

¹¹ Meɗ ŋaata vaŋu goy kay nisi sa waŋu, hin ɗigerta vaŋu kay nisi sa diksi ɗigera.

¹² Sa sli yam tuwsi kulona hinsi gaysi co katanɗi, sa jiw-zlata hin ɓisi digiɗan goyɗi kaw.

¹³ Nisi sa li bay-ɗigerta cuk ɗawn cuki gaa'a. Nisi zuti gaa'a, as kay yaw kulo loɗi kaw.