NULLA 35 - BIBALDA TA PELDETTA

1 Nulla vi David.

¹ Nulla vi David. Ma-Vatɗina, gutaŋ kanu vok nisi sa ka gawt kanu, duraŋ hiɗi nisi sa duranu kaw.

² Yawaŋ kuroŋŋa hiɗi marayta, fokaŋ kulo'o kay gut kuɗanu.

³ Sum sa lasanna naŋ ma ɦaɓsi hiɗi kawayta, hiɗi yakata vaŋu. Daŋ tam ciwta van ala: Nanu mi sa ma su'da vagu.

⁴ Nisi sa gar irita vanu hinsi muɗ goy zulo'o, muɗ goy waa'a kaw. Nisi sa var kay lan joo'o hinsi hot bugolo, muɗ zulo'o kaw.

⁵ Hinsi muɗ ki burana dol kuɗ simeɗna nala, hin sunda-wuralawna vi Ma-Vatɗina digiɗsi goy vokomu.

⁶ Hin hagata visiya muɗ jufunu, golɓoto kaw, hin sunda-wuralawna vi Ma-Vatɗina jaŋ kuɗsiya kaw.

⁷ Kay nisi bar yam zulda vokanu, gan jawt vokanu kaw bay lawta, nisi jugoɗ zulda vokan bay lawta kaw, kay yaw irita van goyo.

⁸ Hin ɓulak-goyta co kisi tugumu, hinsi vi hay jawta ta nisi gana' vokanta, hinsi cuk gaa'a hay zulda kay ɓulak-goyta visiya.

⁹ Ciwta vanu ma li firiya hay Ma-Vatɗina, firi ŋolo hay su'da valamu.

¹⁰ Zokan pet ma di'e: Ma-Vatɗina, sa ma as ki naŋ nala kay but sa ma hay lasta goy vun sa ma dono suwumna mi gige? As but sa ma hay lasta hiɗi sa ma hawna goy hay ɓam sa vurumsina mi gige?

¹¹ Sa li di-goyta ta sinda yaw kulo'o, nisi joban kay va ma nan wumɗi.

¹² Nisi wurakan joota hay baŋal ŋaata vanu, ciwta vanu noyay goyo.

¹³ Hay li ma nisi ka moyo, nan cuk sligara ma yorta tanu, nan las ciwta vanu hiɗi laata kaw, yan coki gaa dikanu hay li ma nan ka siɗawa.

¹⁴ Nan tuɗ ŋali ŋali ki sa ma moyn mi bananu lebo ɓasunu nala, nan cok yan gaa'a hiɗi yorta ki sa ma ka ti do'ol kay sulumu nala.

¹⁵ May wulini, hay li ma nan ka hay zumalda, nisi tok tuwsiya kay firi kanu. Sa waana sa joona tok tuwsi kanu bay nan wi'e, nisi jetan goy jarsiya, hinan noŋɗi;

¹⁶ hiɗi sa liwisna, juful ma ti slena ma burahta, nisi mut siysi katanu.

¹⁷ Bum-Sumuna, naŋ min ɗuw ɦawa nala ta-ta lancitige? Suɗaŋ ciwta vanu goy vun dugumna visiya, suɗ irita vanu kay goor-zlona.

¹⁸ Nan min suburaŋu jar tok ma ŋolla, suburaŋu jar sumun ŋolo kaw.

¹⁹ Nisi sa ka gawt kanu bay joota, hinsi firi kanɗi, nisi sa ka gawt kanu bay joota vanu, hinsi cimek irsi katanɗi.

²⁰ Kay vunsi may di yoboyn ma toytaɗi, may nisi gar yoboyn ma ɗutta kat sum sa lak ŋal kiliŋ kay nagata.

²¹ Nisi mal vunsi goy katanu, nisi di'e: haha! Wulini irma waawa.

²² Ma-Vatɗina, naŋ wi kayni, mus kiliŋɗi, mus gine hiɗi nanɗi.

²³ Lawna vanu, Bum-Sumuna vanu, zliyaŋ kulo'o, musaŋ iriya kay li tanu kuɗ ɗigerta vanu, ka kitata vanu hay hagata va'a kaw.

²⁴ Ka kitata vanu kuɗ ɗigerta vaŋu, Ma-Vatɗina Lawna vanu, Hinsi a nisi firi kanɗi.

²⁵ Hinsi di hay diksi ala: Ha! Kayni kuɗ minda vuma'a, numa ligimawa goyo, hinsi di naɗi.

²⁶ Nisi kaf sa ka li firi kay lasta vanu, hinsi muɗ zulo'o, caw goy yuloŋ' kaw. Nisi kaf sa subur tuwsi katanu hinsi cuk zulota hiɗi liwista kisiya.

²⁷ Hinsi siwel hiɗi firita, nisi kaf sa min ala nan fi ɗigerta, Awa, hinsi di dok-dok ala: ŋolda tam Ma-Vatɗina ma halalda vi sa ma sunda valamu kiram ŋaa'a.

²⁸ Kay na'ta vunanu ma gi nul kay ɗigerta vaŋu, busa suburaŋ he! Kaw.