NULLA 31 - BIBALDA TA PELDETTA

¹ Tam ma ŋolla vi sa gi nulla. Nulla vi David.

² Ma-Vatɗina nan gar liyna van ma ŋayn taŋ naŋu. Ta-ta hay vatɗita hinan muɗ goy zuloɗi. Suɗan hiɗi ɗigerta vaŋu.

³ Jak humaŋ gaa tanu, laŋ koloyo kay butan goyo. Naŋ ma lin mi hiɗiyna ma nan ŋay talamna, gulmunna vanu, ma nan fi su'da hayamu.

⁴ Kuɗ naŋu mi hiɗiyna vanu, gulmunna vanu. Kay semda vaŋu naŋ min tun vokanu, naŋ min ɗigeranu.

⁵ Naŋ ma patan goy hay jawta ta nisi gana' gaa vokanu; kay naŋu mi ŋomda vanu.

⁶ Hay ɓaŋu nan vul ŋusta vanu; naŋ ma butan goyo, Ma-Vatɗina, Lawn ma gasina.

⁷ Nan ka gaw hiɗi nisi sa girif lawayn waana nan hin tuwan hay ɓam Ma-Vatɗina.

⁸ Nan min li firiya, firi ŋolo kaw hay ŋaata vaŋu, kay naŋ ɗuw hawta vanawa, naŋ wi lasta vi ciwta vanawa kaw.

⁹ Naŋ ma vulan goy hay ɓam sa gawt kanɗi, Naŋ hinan poy hiɗi dikan goy butiya.

¹⁰ Ma-Vatɗina, lan slugota lige, kay nan ka hay lasta, iranu, ciwta vanu hiɗi tuwan kaf ka ɓulak goyo kay yorta.

¹¹ Irita vanu ka tiyof goyo kuɗ yorta, busata vanu ka cap kayni jar cukka-halafta, donota van vatawa kuɗ jiw-zlata vanu, zokan ka tiyofa.

¹² Sa gaw kanna kaf muɗanawa goy mi va ma zulo'o, nan muɗi zulo kir sum sa ziy hiɗi nan kepna, muɗi va ma ɦuyum' kir boniyonna; nisi sa wan iran goy jiya pir vokan jaŋi.

¹³ Yisi jokanawa ki sa ma mitin nala, nan muɗi ki doway ta toy goyo nala.

¹⁴ Kay nan hum lawta joota vi sumuna ŋolo, joota hay liyn pete, hay li ma nisi ŋra vunsi kanu, nisi gar hagata kay can goyo.

¹⁵ May nanu, nan zamaŋgi mi ɓaŋ naŋu, Ma-Vatɗina. Nan di'e: Naŋu mi Lawna vanu.

¹⁶ Buura van ma vokanna kaf ka hay ɓaŋ naŋu; naŋ butan goy kay sa gaw kanna, hiɗi sa lan lasna butge.

¹⁷ Hin vokaŋ li haraŋi kay sunda vaŋu lige. Suɗan kuɗ ŋaata vaŋu suɗge.

¹⁸ Ma-Vatɗina hinan muɗ goy zuloɗi, hay li ma nan yi semda vaŋu. Hin sa joona muɗ zulo'o. Hinsi kal hay liyna vi mitta hiɗi vunsi dukiya.

¹⁹ Hin sa sinda a vunsi muɗ numulu, vunsi ma kus yoboy ma joona kat sa ɗigera, vunsi ma sli yam tuwam kulo kat sa ɗigera, hiɗi vunsi ma ŋulda kaw.

²⁰ ŋaata vaŋu na' ŋolo natige. Na'a ta naŋ ŋaya' kulo'o kay sa li nar kuɗaŋu, ta naŋ la' kisi nisi sa ŋay taŋu, vok ir sum-wuran kaf.

²¹ Naŋ ŋaysi hay liyn ma ŋayna vi vok iraŋu kay ŋra-vunda joota vi sumuna, naŋ ŋaysi hay ziyda, naŋ ŋaysiya kay sum sa min dursiya.

²² Suburta tam Ma-Vatɗina. Kay nam ɗek slugota valamawa goy tanu, ki nan ka musi hay hoyok-ziy ŋol ma dono'o nala.

²³ Nan di hiɗi sukan yaway kelan ala: Nan digiɗisawa goy vok iraŋ pa, may nir na'ta kepe naŋ hum del siɗawta vanawa, hay li ma nan siwel taŋu.

²⁴ Mingi Ma-Vatɗina, nigi sa peldetna valamu. Ma-Vatɗina ŋom sa gasina, sa ma subur tuwamna nam ka kitat kalam ŋolo.

²⁵ Lakgi dono'o, hingi dikgi muɗ kursuliya, nigi kaf sa cub Ma-Vatɗina.