NULLA 30 - BIBALDA TA PELDETTA

¹ Nulla kay malta vi vun-ziyda. Nulla vi David.

² Ma-Vatɗina, nan min suburaŋu, kay naŋ slan kulo'o, hin sa gawt kanna firi kanɗi kaw.

³ Ma-Vatɗina Lawna vanu, nan siwel taŋu, naŋ muɗanawa goy ŋaa'a kaw.

⁴ Ma-Vatɗina, goy hay liyna vi sa mitin pa, naŋ mar ciwta vanawa kulo'o, naŋ hinan iriya kay nan ma kal gaa hay zuldaɗi.

⁵ Gi nul tam Ma-Vatɗina, nigi sa minimna, suburgita kuɗ peldetta vi semda valamu.

⁶ Kay ɦiyda valamu mus neeɗa ɦawa, may slugota valamu mus ta-ta hay vatɗita, hay vulatita tiyn co'o, may hay graw culumta ti firita.

⁷ May hay musta ŋaata vanu nan di'e: Ta-ta hay vatɗita nan ma ge'ɗi.

⁸ Ma-Vatɗina, kuɗ slugota vaŋu, naŋ col hiɗiyna van dono'o. Naŋ ŋay vokaŋu, kay na'ta nan li nari.

⁹ Ma-Vatɗina nan siwelay taŋu, nan siɗawaŋ naŋ Ma-Vatɗina.

¹⁰ Va ma naŋ fum kuɗ busuwan mi mige, la naŋ jikan gaa hay zulda? Buɗufna as suburaŋ su? Nam as di goy kay ɗigerta vaŋ su?

¹¹ Ma-Vatɗina, human humge. Laŋ slugot kan lige. Ma-Vatɗina, gutan gutge.

¹² Naŋ muɗ yorta vanawa goy pirta-tiɗiŋŋa, naŋ but sligara van ma yorawa goyo, naŋ cukan tuwanawa hiɗi firita.

¹³ Kay dikanu fi gi nul ma suburta taŋu, fi ziŋɗi kaw, Ma-Vatɗina Lawna vanu, nan min gaŋ deɓe ta-ta hay vatɗita.