NULLA 29 - BIBALDA TA PELDETTA

1 Nulla vi David.

¹ Nulla vi David. Nigi gurona vi Lawna, vulgi mi Ma-Vatɗina, vulgi mi Ma-Vatɗina gajijita hiɗi suburta.

² Vulgi mi Ma-Vatɗina gajijita kay semda valamu, girifgi gaa vok Ma-Vatɗina hiɗi ganna ma peldetna.

³ Del Ma-Vatɗina ka tiy kulo'o kay niyna, Lawn ma gaŋeraŋ-petna ka muɗ niyn tiya, Ma-Vatɗina ka poy kulo kay niyn ma ŋolla.

⁴ Del Ma-Vatɗina ka tiy dono'o, del Ma-Vatɗina tiy hiɗi gajijit ŋolo.

⁵ Del Ma-Vatɗina kus gu-gamna goyo; delem kus gu-gamna ma hay Libaŋ goyo.

⁶ Nam muɗum ɦal kulo'o ki goor-putna nala, nam muɗ Libaŋ hiɗi Siriyon ki funda wayata nala.

⁷ Kuta wileta kalay goyo hay della vi Ma-Vatɗina.

⁸ Del Ma-Vatɗina wir fulda, Ma-Vatɗina wir fulda vi Kades.

⁹ Del Ma-Vatɗina muɗ dukga a na' vuɗ goora va' goyo, par jurut gaa'a kaw. Vok mulda valamu slen kaf siwel ala: Gajijita.

¹⁰ Ma-Vatɗina ka musi kay zlamda-mulda, hay li ma niyn de'e kulo kay nagata. Awa, Ma-Vatɗina musi kay zlamda-mulda ta-ta hay vatɗita.

¹¹ Ma-Vatɗina vul donota mi sumuna valamu; Ma-Vatɗina gi bol kay sumuna valamu, vulsi sle'ta kaw.