NULLA 27 - BIBALDA TA PELDETTA

1 Nulla vi David.

¹ Nulla vi David. Ma-Vatɗina mi haraŋa vanu, su'da van kaw, nan ma li nar kay gige? Ma-Vatɗina mi donota vi irita vanu, nan ma li nar kay gige?

² Hay li ma sa jiw-zlata co goboy katanu kay ligan goyo, sa fok kulo kanu sa gawt kanna kaw, nisi sli zlaraŋgaɗaya, cap puk gaa'a kaw.

³ La vok-ma-duura zlar goy vokanu kay dur hiɗi nanu, nan as li narɗi, la duura fok kulo kanu kaw, hay na'ta nan ma mus hiɗi iran teŋiya.

⁴ Nan siɗaw Ma-Vatɗina kay va kepe, va ma nan min gar hiɗi dikan kep kayn ala: Nan min mus hay ziyna vi Ma-Vatɗina buura vi irita van kaf, kay ɗuw jifiyta vi Ma-Vatɗina, kay peɗ Tempella valamu kaw.

⁵ Kay nam ma ŋoman hay tabernaklena valamu hay buur ma joona, nam ma ŋomanu hay liyn ma ŋayna vi guɗukŋa valamu; nam ma naran kulo'o kay hiɗiyna.

⁶ Wulini nan min sli yan kulo'o kat sa gaw kanna sa ka ŋuyanu; nan min li ɗifini hay guɗukŋa valamu hay buwna vi togolomna; nan ma gi nulla, nan ma tiy sem Ma-Vatɗina.

⁷ Ma-Vatɗina human delan humge, nan siwel kulo ŋolo, lan slugota lige, human humge.

⁸ Hay li ma naŋ di'e: Gargi kay ɗuw vokanu, dikan di ala: Ma-Vatɗina nan min gar kay ɗuw vokaŋu.

⁹ Ŋay iraŋ goy kanɗi. Gi sa ma sunda vaŋ goy kuɗ ɦiydaɗi. Naŋ ma gut kuɗanna, gan goyɗi, hinan goyɗi kaw, naŋ Lawna ma su'da vanu.

¹⁰ Kay bunu hiɗi sunu hinanawa, may Ma-Vatɗina slanawa kulo'o.

¹¹ Ma-Vatɗina, hatan hagata vaŋu, ɗekan kay hagata vi ɗigerta, kuɗ sa gawt kanna.

¹² Vulan goy tam minda vi sa gawt kannaɗi, kay sum sa li di-goyta ta sinda yaway kulo ŋolo kanu, sum sa puruf hiɗi di-goyta ta joota.

¹³ Awa, nan var ala nan ma wi ŋaata vi Ma-Vatɗina hay nagata vi sa irina yo!

¹⁴ Cub Ma-Vatɗina, mus dono'o hiɗi dikaŋ muɗi kursuliya, cub Ma-Vatɗina.