NULLA 25 - BIBALDA TA PELDETTA

1 Nulla vi David.

¹ Nulla vi David. Ma-Vatɗina nan muɗ ciwta van kulo taŋu.

² Lawna vanu, nan vi hayaŋu, hinan muɗ goy zuloɗi, Hin sa gaw kanna li firi kuɗanɗi.

³ Nisi kaf sa zamaŋ ɓanu, Kep kaw ma muɗ zulo'o kuɗsiɗi, Nisi sa li joo bay sa lisi joo'o, ma muɗ zulo'o.

⁴ Ma-Vatɗina ɗekan kay hagata vaŋu, hatan kay hagata vaŋ vaŋ ta gurayta.

⁵ Ɗekan kay gasita vaŋu, hatan kaw, kay naŋu mi Lawna ma su'da vanu, nan ka zamaŋ ɓaŋu hay buurta kafe.

⁶ Ma-Vatɗina, humaŋ ma gaŋ gi' kay slugota hiɗi ŋaata vaŋu; kay kayni ka dok-doko hay vatɗit goŋ'.

⁷ Humaŋ ma gaŋ kay joota ta nan la' hay joriyota vanu hiɗi raw-goyta vanɗi; humaŋ ma gaŋ kanu kuɗ slugota vaŋu, kuɗ ŋaata vaŋu, naŋ Ma-Vatɗina.

⁸ Ma-Vatɗina nam ŋaa'a, ɗigere kaw, kay na'ta nam ɗek hagata mi sa sulukŋa.

⁹ Sa hot yisi gaana nam narsi hay ɗigerta, sa hot yisi gaana nam ɗeksi hagata valamu.

¹⁰ Hagata vi Lawna kaf ti slugota hiɗi gasita, tam sa li kuɗ bonota valamu hiɗi vun-ma-gatna valamu.

¹¹ Kuɗ semda vaŋ naŋ Ma-Vatɗina, naŋ min vul gida kay jiw-zlata vanu, kay jiw-zlata vanu na' ŋolo.

¹² Sa ma li nar kuɗ Ma-Vatɗina nam mi gige? Namu Ma-Vatɗina ma hatam hagata ta nam ma vileka.

¹³ Ciwta valam ma tun suk hay sle'ta, jafna valamu ma fi nagata hay vocota.

¹⁴ Ma-Vatɗina li bono'o hiɗi nisi sa li nar kuɗumu, nam min ɗeksi kay bonota valamu kaw.

¹⁵ Iran muɗi tam Ma-Vatɗina dok-doko, kay nam ma patan sen goy hay jawta.

¹⁶ Muɗaŋ iraŋ tanu lan slugota lige, kay nan hini goy van kepe, muɗi hawi kaw.

¹⁷ Yorta vi dikanu jorawa; naŋ ma vanay goy hay lasta van page.

¹⁸ Ɗuwaŋ lasta hiɗi hawta van ɗuwge. Cukan sulukŋa van goy kaf cukge.

¹⁹ Ɗuwaŋ sa gawt kanna ka ŋolo natige, nanige nisi ka gaw kan ŋolo natige.

²⁰ Ŋom ciwta vanu, suɗan goyo kaw, hinan muɗ goy zuloɗi, kay nan ŋay tuwan taŋu.

²¹ Hin gasita hiɗi ɗigerta ŋuyanu, kay nan ka zamaŋ ɓaŋu.

²² Naŋ Lawna, butaŋ sa Israyella goy vun lasta kaf butge.