NULLA 24 - BIBALDA TA PELDETTA

1 Nulla vi David.

¹ Nulla vi David. Nagata kayni vi Ma-Vatɗina, sle ma haya'na pet kaw; nagata hiɗi nisi sa lak haya'na pet kaw.

² Kay nam tun dir nagata gaa kay niy-lum ma ŋolla, ina' ɗeŋe kay niy-lumna kaw.

³ Ma fi jik kulo'o kay hiɗiyta vi Ma-Vatɗina mi gige? Ma fi col hay liyna valamu ma peldetna gige?

⁴ Kayni mi sa ma ɓalam bay joota hiɗi dikam peldete, sa ma vul tuwam goy tam sindaɗi, yi va kalam hiɗi ɗuttaɗi kaw.

⁵ Nam ma fi bolda vi Ma-Vatɗina, hiɗi slugota vi Lawn ma su'da valamu kaw.

⁶ Kayni mi ir ɓurawta vi jaf-sum sa yi semda valam hay vunsiya, nisi sa gar kay waŋ iraŋu, si gurona vi Yakub. Gi-suk.

⁷ Poŋgi yigi kulo'o nigi vun-galana, yawgi kulo'o nigi vun-ziyn ma vatɗina, ta-ta mul ma gajijita fi kal kalafi.

⁸ Mul ma gajijita kayni nam gige? Mi Ma-Vatɗina ma gaŋeraŋa, ma donona, Mi Ma-Vatɗina ma gaŋeraŋ hay duura.

⁹ Poŋgi yigi kulo'o nigi vun-galana, yawgi kulo'o nigi vun-ziyn ma vatɗina, ta-ta mul ma gajijita fi kal kalafi.

¹⁰ Mul ma gajijita kayni nam gige? Mi Ma-Vatɗina vi vok-ma-duura, namu mi mul ma gajijita. Gi-suk.