NULLA 21 - BIBALDA TA PELDETTA

¹ Tam ma ŋolla vi sa gi nulla. Nulla vi David.

² Ma-Vatɗina, mulla li firiya kay donota vaŋu. Ki gutda vaŋu hobom hiɗi firita nala.

³ Naŋ vulumawa kuɗ darta vi dikamu. Sle ma vunam poŋ kay siɗawaŋ kalamna naŋ may telemɗi kaw. Gi-suk.

⁴ Kay naŋ ɗekemawa goy jewe hiɗi bolda vi slugota vaŋu. Naŋ tun bogoray or ma bay-rigasnawa kalamu.

⁵ Nam siɗawaŋawa kay irita, naŋ vulumtawa may, irita ta mus ta-ta hay vatɗita.

⁶ Nam fi gajijitawa ŋolo kuɗ gutda vaŋu, ŋolda hiɗi suburta kaf naŋ cuk kalamu.

⁷ Kay naŋ musum kay gi bolda ta-ta hay vatɗita, naŋ hobom hiɗi firita vok iraŋu.

⁸ Kay mulla zam ɓam Ma-Vatɗina, kuɗ slugota vi ŋol ma Kulo-Jamna nam ma ge'ɗi.

⁹ Ɓaŋu ma fi sa gawt kaŋŋa kaf, ɓaŋ ma jufna ma fi nisi sa ka gaw kaŋŋa kaf.

¹⁰ Naŋ ma muɗsi ki zul ma kuta nala, hay li ma naŋ ma col voksiya, Ma-Vatɗina ma ŋalsi goyo hay ɦiyda valamu. Kuta ma ŋalsi goyo may.

¹¹ Jafna visiya naŋ ma vatam goyo kay nagata, naŋ ma vatsi jafsi goy jar gurona vi sumuna.

¹² Kay nisi var kay li joo'o kataŋu, nisi ŋra vunsi kay zlata joota, may nisi as kay li vaɗi.

¹³ Kay naŋ ma muɗsi ŋorsi bugolsiya, naŋ ŋra ɓarawta vaŋu hay voksiya.

¹⁴ Ma-Vatɗina fokaŋ kulo'o hiɗi donota vaŋu. Numa min gi nulla, subur lopna vaŋ ma ŋulona.