NULLA 17 - BIBALDA TA PELDETTA

1 Siɗawta vi David.

¹ Siɗawta vi David. Ma-Vatɗina, humaŋ law ma ɗigera, jakaŋ humaŋ tam siwelda vanu. Muɗ humaŋ tam siɗawta vanu ta may goy hay vunan pa bay ɗutta,

² Hin ɗigerta vanu ɗek tuwa' goy vokaŋ ɗeke, iraŋ ma ɗuw kay gasita van ɗuwge.

³ La naŋ fek dikanu, la naŋ co ɗuwan henjeta, la naŋ wakanu kaw, naŋ as fi va hayanɗi. va ma kal goy hay vunanu ŋray ca hiɗi va ma nan varamu kaw.

⁴ Hay li ma nan wi lopna vi sumuna, nan vi kuɗ yoboyna vi vunaŋu. Nan ŋom tuwanu kay hagata vi sum sa waskayna.

⁵ Nan col dono'o hay hagata vaŋu, senu may zlirgat goyɗi.

⁶ Lawna nan yaŋu, kay naŋ humanu, naŋ Lawna. Muɗ humaŋ tanu, hum yoboyna van humge.

⁷ Ɗek ŋaata vaŋ ta ŋolda goyo, naŋu ma suɗ sum sa ŋay taŋu, nisi sa ŋay taŋu, naŋ butsi goy hay ɓam sa gaw kisina hiɗi ɓaŋ ta jufta.

⁸ Ŋomanu ki wal-irta nala, ŋayan gaa kuɗ ɗuŋus gilaŋataŋu.

⁹ Ŋomanu kay sa jiw-zlata sa ka lasanu, kay sa ka gaw kan tam mitta sa ka ŋuyanu.

¹⁰ Nisi duk diksiya, jigal-tuwta ka hay vunsiya.

¹¹ Arigekaw ma numa tuɗa, nisi ka ŋuyma'a, Irsi ka cigeɗa ka beɗma gaa kay nagata.

¹² Nisi ŋray ca ki zlona ma min mut va'a nala, ki goor-zlona ka cigeɗ kuɗ juruta nala.

¹³ Ma-Vatɗina, fokaŋ kulo'o, ŋafam iramu, gum goy gaa'a. Suɗan goy kay sa ma jiw-zlata hiɗi kew-gaferaŋa vaŋu.

¹⁴ Ma-Vatɗina, suɗan goy hay ɓam sum sa hay nagat tanna hiɗi ɓaŋu, sum sa galla visi hay irita ta hay nagat tanta, sa naŋ hobsi haysi hiɗi slena vaŋu, gurona visi ka hobiya, slena visi nisi hinim bugolsiya kay gurosgurayna visiya.

¹⁵ May nanu, nan ma wi vok-iraŋu hiɗi ɗigerta, hay li ma nan zliyawa kulo'o, hayan ma hoba kay ɗuw ma nan ɗuw jifna vaŋŋa.