NULLA 16 - BIBALDA TA PELDETTA

1 Nulla vi David.

¹ Nulla vi David. Lawna koɗaŋ ŋarak kanu, kay nan ka gar kay ŋay tuwan taŋu.

² Nan di tam Ma-Vatɗina: Naŋu mi Bum-Sumuna vanu, va ma ŋaa'a ma nan fum goy suwaŋ naŋ mayɗi.

³ Sa peldetna sa ka hay nagatna nisi jifiy ŋolo, nisi kiran ŋaa'a ŋolo.

⁴ Lawayn ma waana biyay ŋolo, nisi jaŋ kuɗ lawayn mara'a, ɗifinna visi ma hiɗi busuwna nan min yamam goyɗi, nan min yi semda visi hay vunanɗi.

⁵ Ma-Vatɗina mi vocota vanu hiɗi kaway-ma-cina vanu, ir slena van ka koti kaŋu.

⁶ Nan fi galla vanu hay liy ma ŋaana, vocota vanu ta naŋ vulantita ti ta jifiy suwta.

⁷ Nan min gi deɓ mi Ma-Vatɗina ma ɗekan hagatawa, Hay henjeta kaw dikan ka dan yali.

⁸ Nan tun Ma-Vatɗina vokan dok-doko, hay li ma nam ka hay galan ta jufta, nan as ge'ɗi.

⁹ Kay na'ta dikan ka li firiya, ŋusta vanu ka hay firita ŋolda, tuwan kaw ka tun-suk ŋaa'a.

¹⁰ Kay naŋ min hin ciwta vanu hay liyna vi mittaɗi, kay naŋ min hin ma hayaŋ kalamna wi lo'da-goytaɗi.

¹¹ Naŋ ma ɗekan kay hagata vi irita, hobta vi firita ka vok iraŋu. Sle'ta vatɗita ka gal ɓaŋ ta jufta.